Ngjarje

Veprimtari me Institutin "Goethe"

Marrëveshje bashkëpunimi midis Bibliotekës Kombëtare të Shqipërisë dhe Institutit “Goethe”

 

Më 7 mars 2006 në mjediset e Bibliotekës Kombëtare, ndërtesa e vjetër, përballë Kuvendit të Shqipërisë, u zhvillua ceremonia e nënshkrimit të Marrveshjes së bashkëpunimit midis Bibliotekës Kombëtare të Shqipërisë dhe Institutit “Goethe”. Marrëveshjen e nënshkruan: për palën shqiptare drejtori i BK Dr. Aurel Plasari, ndërsa për palën gjermane drejtor i Institutit “Goethe”, Selanik, Karl Heinz Thalmann. Ishin të pranishëm në ceremoni zv. ministri i Turizmit, Ri­nisë dhe Sporteve, Znj. Suzana Turku, ambasadori i Gjermanisë në Tiranë Hans Peter Annen, specialistë të shkencës dhe të kul­turës, përfaqësues të shoqatës kulturore gjermanoshqiptare “Robert Schwartz” etj.

Marrëveshja bën pjesë në kuadrin e nismës “Njerëzit dhe librat Gjermania ndihmon bibliotekat e Europës Qendrore dhe Lindore”, falë tës cilës Biblioteka Kombëtare e Shqipërisë do të mbështetet për një periudhë trevjeçare me një fond koleksionesh (libra, botime referuese, periodikë etj.) me një vlerë prej 15.000 eurosh. Ceremo­nia e nënshkrimit lajmëroi njëkohësisht hapjen së shpejti të “Sallës së Gjuhës Gjermane” në një nga mjediset e kësaj ndërtese historike.

 

 

Përurimi i Sallës Gjermane të Leximit

 

Më 13 nëntor 2006 në mjediset e aneksit të Bibliotekës Kombëtare u përurua Salla Gjermane e Leximit, e cila do të vejë në shfrytëzim për lexuesit e kryeqytetit një fond mjaft të pasur me literaturë të gjithllojshme gjermane. Në ceremoninë përuruese morën pjesë ministri i Turizmit, Kulturës, Rinisë dhe Sporteve z. Bujar Leskaj, titullarë të ambasadës gjermane në Tiranë, përfaqësues të Institutit Gëte, lexues, drejtues dhe punonjës të bibliotekave të Tiranës etj.

Në fjalën e rastit, z. Aurel Plasari, Drejtor i Bibliotekës Kombëtare, pasi falendëroi nismën e palës gjermane në ndihmë të institucionit që ai drejton, theksoi se literatura e dhuruar nga Instituti Gëte do t’u shërbejë lexuesve tanë për t’u njohur më mirë me traditat, kulturën, historinë dhe letërsinë gjermane. Një kontribut me vlerë për koleksionet e kësaj salle, nënvizoi Dr. Aurel Plasari, përbëjnë edhe librat e përzgjedhur me kujdes nga fondi libror i Bibliotekës Kombëtare.

Salla Gjermane e Leximit tashmë është pjesë e shërbimeve bibliotekare të Bibliotekës Kombëtare dhe u vjen në ndihmë lexuesve gjermanofonë, studentëve dhe pedagogëve të gjuhës gjermane etj. në një mjedis të restaruruar posaçërisht për këtë qëllim dhe të pajisur me mjete dhe teknologji moderne të informacionit.

 

 

Mbrëmje letrare me shkrimtarin gjerman Gernot Wolfram

Biblioteka Kombëtare dhe Shoqata kulturore shqiptaro-gjermane “Robert Schwartz” organizuan më 14 nëntor 2006 në Sallën e Librit Gjerman një mbrëmje letrare me Gernot Wolfram, prozator i ri gjerman, lauerat i disa çmimeve, i njohur për tregimet e holla psikologjike në traditën e shkrimtarëve të shquar Th. Mann, F. Kafka, H. Boell etj.

Në kuadër të nismës “Njerëz dhe Libra” shkrimtari gjerman zhvilloi disa veprimtari në Tiranë dhe në qytete të tjera të vendit