Ngjarje

Festohet 85-vjetori i përurimit të Bibliotekës Kombëtare të Shqipërisë

 

Në pritjen e dhënë më 27 nëntor 2007 nga drejtori i Bibliotekës Kombëtare të Shqipërisë dr. Aurel Plasari për të festuar 85-vjetorin e themelimit të saj, morën pjesë personalitete të jetës kulturore dhe shoqërore të vendit, diplomatë të huaj, lexues, punonjës të bibliotekave etj. Në fjalën e rastit, drejtori Plasari nënvizoi faktin që Biblioteka Kombëtare u themelua në kushte të vështira të ekzistimit të shtetit shqiptar. “Njërën ndër mrekullitë që bënë shqiptarët më 1920-n”, e quajti ai këtë themelim.
Zoti Plasari përkujtoi ata qindra punonjës që ia kushtuan energjinë dhe pasionin e jetës së tyre Bibliotekës Kombëtare. Ai gjeti rastin, gjithashtu, të falënderojë të gjithë ata punonjës me të cilët ka punuar dhe vijon të punojë për përparimin e institucionit. Duke cituar mesazhin e dërguar nga kryeministri Sali Berisha, në pamundësi të pjesëmarrjes në këtë festim, z. Plasari e cilësoi atë “frekuentues të moçëm të kësaj biblioteke” dhe e falënderoi për kujdesin e veçantë ndaj këtij institucioni në këta dy vjet të qeverisjes së drejtuar prej tij. Pasi bëri një paraqitje të shkurtër të zhvillimeve të punës shkencore dhe të shërbimeve ndaj publikut në institucion, Dr. Aurel Plasari përvijoi drejtimet kryesore të punës për vitin e ardhshëm e më tej, i bindur se “kombi shqiptar përvjetorin e këtij themelimi do ta festojë edhe për qindra e qindra vjet të tjerë”.
Në përshëndetjen e tij z. Genc Pollo, ministër i Arsimit dhe Shkencës, pasi vlerësoi veprimtarinë e Bibliotekës Kombëtare në ndihmë të zhvillimit të gjithanshëm të shoqërisë shqiptare, u ndal në lidhjet e shkollës me bibliotekat dhe në përgjithësi me librin duke nën vizuar përpjekjet që bëhen për një menaxhim më të mirë të teksteve shkollore.
Duke përshëndetur në emër të Ministrisë së Turizmit, Kulturës, Rinisë dhe Sporteve, zëvendësministrja znj. Zana Turku shprehu angazhimin e plotë të dikasterit për mbështetje financiare dhe me mjedise në mënyrë që Biblioteka Kombëtare ta kryejë, ashtu siç i ka hije, shërbimin e saj madhor ndaj kulturës dhe kombit shqiptar.
Nën tingujt e muzikës së luajtur nga Kuarteti i harqeve të pranishmit kaluan çaste të gëzuara, që u shoqëruan me trokëllima të gotave të verës në një banket të ngrohtë e festiv.