Ngjarje



Persida Asllani, drejtore e Bibliotekës Kombëtare të Shqipërisë, bashkë me Etleva Domin, nëndrejtore, priti sot në një takim të veçantë një delegacion të Bibliotekës Kombëtare të Kosovës "Pjetër Bogdani" i përbërë nga Bedri Zyberaj, u.d. i drejtorit, Sali Bashota, kryetar i Këshillit Drejtues, dhe Dashamir Bërxulli, anëtar i Këshillit Drejtues.

Drejtuesit e BKK "Pjetër Bogdani", i uruan Znj. Persida Asllani suksese dhe përparime të mëtejshme në detyrën e Drejtores së Bibliotekës Kombëtare të Shqipërisë.

Drejtorja Asllani shprehu kënaqësinë, që delegacioni i parë, që po pret, pas pranimit të detyrës është pikërisht nga Biblioteka Kombëtare e Kosovës, duke theksuar rëndësinë e veçantë të bashkëpunimit midis dy institucioneve.

Më tej, takimi vijoi me diskutimin e finalizimit të projekteve ekzistuese dhe inicimin e projekteve të reja të përbashkëta. Përfaqësuesit e të dy institucioneve më të larta të bibliotekonomisë në vendet respektive u angazhuan për një intensifikim të bashkëpunimit në interes të kulturës kombëtare.