Ngjarje

Konferencë nga Luçia Nadin kushtuar botimeve veneciane


Studiuesja e mirënjohur Luçia Nadin mbajti ditën e premte, më 24 tetor, në mjediset e Bibliotekës kombëtare konferencën me temë “Botimet veneciane në kohën e Aldo Manuzio-s dhe veprimtaria e Benardino Vitali-t, botues i Marin Barletit”. Kjo konferencë, e organizuar në bashkëpunim nga Biblioteka kombëtare dhe Instituti Italian i Kulturës në javën XIV-të të gjuhës italiane në botë, u hap me mirëseardhjen e ngrohtë, të shprehur në emër të të gjithë të pranishmëve nga drejtoresha Persida Asllani, një mirëseardhje e cila sipas saj po i jepej “dikujt që rikthehet në shtëpinë e vet, sepse e tillë është jo vetëm Biblioteka kombëtare për profesoreshën Luçia Nadin, por edhe bota universitare shqiptare e bota kulturore e shkencore në Shqipëri për të, shtëpi dhe tempull që ajo e pasuron prej mëse 20 vjetësh me pasionin e rrallë dhe sidomos me zbulimet e kontributet e saj të çmuara”. Shprehje e kësaj mirëseardhjeje ishte edhe një ekspozitë e vogël e konceptuar posaçërisht për këtë rast me veprat dhe kontributet e Luçia Nadin në të dy gjuhët, italisht dhe shqip, pjesë të fondit të Bibliotekës kombëtare, në vitrinat e së cilës shkëlqenin jo vetëm “Statutet e Shkodrës”, “Shqiptarët në Venedik” dhe “Shqipëria e rigjetur”, por edhe vepra e saj më e fundit, në botim dy gjuhësh "Venezia dhe Shqipëria, një histori takimesh dhe lidhjesh shekullore". I pranishëm, ambasadori i Italisë në Shqipëri, zoti Massimo Gaiani, u shpreh se “librat e zonjës Nadin, që i kam lexuar me kujdes, më kanë ndihmuar të kuptoj më mirë vlerat dhe botën shqiptare”.

Gjatë ligjëratës, Lucia Nadin, në mënyrë të thukët e të qartë, shoqëruar edhe me ilustrime e faksimile, paraqiti kuadrin e shtypit në Venecien e shekujve XV-XVI si kryeqyteti europian i librit dhe editorisë, duke u ndalur në mënyrë të veçantë te figura dhe aspektet botuese të Aldo Manuzio-s dhe në veprimtarinë botuese si dhe elementë jetësorë të Bernardino Vitali-t, venecianit me origjinë shqiptare, botuesit të veprës së Marin Barletit.

Në konferencë ishte e pranishme edhe Ministrja e Kulturës zonja Mirela Kumbaro, së bashku me shumë studiues e pegagogë të fushave të historisë, filologjisë dhe kulturës shqiptare, të cilët përfituan nga kjo veprimtari jo vetëm për t’i shprehur profesoreshës Nadin vlerësimet e tyre më të larta, por edhe të parashtronin dhe të shkëmbënin me të informacione, mendime dhe hipoteza pune më të thelluara.

Ligjërata e plotë e Luçia Nadin