Ngjarje

Bashkëbisedim me Prof. Andrew Wachtel


Mbasditen e 5 dhjetorit, në auditoriumin e Bibliotekës Kombëtare u zhvillua një bashkëbisedim me autorin Andrew Wachtel rreth librit të tij, përkthyer tashmë edhe në shqip, "Ballkani në historinë botërore". Ky aktivitet, fryt i bashkëpunimit të Bibliotekës Kombëtare dhe Institutit të Librit dhe Promocionit ishte konceptuar si një shkëmbim pikëpamjesh dhe leximesh të ndryshme mbi historinë e Ballkanit dhe vendit të historisë së Shqipërisë në të. Historianë të ftuar posaçërisht për këtë, si z. Dorian Koçi, znj. Ana Lalaj dhe znj. Sonila Boçi, parashtruan gjykimet, vlerësimet por edhe kundërshtimet e tyre shkencore në lidhje me aspekte të ndryshme të librit, duke i sjellë jo vetëm auditorit por edhe vetë autorit të librit, perspektiva të reja hulumtuese dhe historishkruese.

Në mbyllje të referimit të tij, Prof. Wachtel, e vlerësoi takimin si një moment të çmuar e stimulues shkëmbimi profesional. Drejtoresha e BKSH, znj. Asllani, duke e falënderuar autorin dhe historianët për kontributin e tyre, e cilësoi debatin shkencor si një nga prioritetet e jetës shkencore të institucionit që ajo drejton.