Ngjarje

Kremtimet e 100-vjetorit të Marguerite Duras në BKSH


Mbasditen e 9 dhjetorit në Biblioteken Kombëtare, u zhvillua një takim i veçantë i të pasionuarve të letërsisë frënge, nën titullin simbolik Mbrëmje me Marguerite Duras, kushtuar 100- vjetorit të saj të lindjes. Aktiviteti, u çel në mënyrë simbolike nga Drejtorja e Bibliotekës Kombëtare znj. Asllani e cila, nën tingujt e variacioneve muzikore moderato cantabile të Diabellit, mbasi përshëndeti përzemërisht praninë e spikatur të Shkëlqesi e Tij, ambasadorit të Francës në Shqipëri, Z. Fitoussi dhe Ministres së kulturës, Znj. M. Kumbaro, e cilësoi praninë e tyre jo aq të lidhur me deyrën e tyre zyrtare se sa me faktin se vinin aty si lexues e përkthyes të pasionuar të Durasit.

Moderatorja e aktivitetit, pedagogia dhe përkthyesja e njohur Saverina Pasho, prezantoi veprën dhe jetën e shkrimtares së shquar të letrave franceze, Marguerite Duras, duke shpërfaqur veprën e pasur e proteiforme të Duras, personalitetin e saj poliedrik.

Më pas, Znj. Kumbaro ndau me audiencën përvojën e saj si përkthyese e romanit « Moderato cantabile » duke e tërhequr auditorin drejt sfidave por edhe sharmit që ofron përvoja e përkthimit.

Regjisori Gentjan Koci, duke propozuar me shije një qasje pak të njohur për publikun shqiptar, u foli pjesëmarrësve për një Duras-it kineaste. Përmes sekuancash të përzgjedhura filmike ai komentoi teknikat e reja përmes të cilave ajo mendonte të revolucionarizonte kinemanë franceze.

Mbrëmja u gjallërua në mënyrë të veçantë nga inskenimi i një interviste të Duras –it nga dy studente të gjuhës frënge A. Toqi dhe A. Voci.

Së fundi, fjalën e mori Z. Ambasador i Francës në Shqipëri Z. B. Fitoussi për të ndarë me pjesëmarrësit përshtypjet e tij mbi një Duras veçanërisht intelektuale dhe artiste. Më pas ai u është drejtuar studentëve për t’u folur për perspektivën e hyrjes së Shqipërisë në familjen evropiane dhe përgatitjen e qytetarëve të rinj të kësaj bashkësie të së ardhmes.