Ngjarje

Java e bibliotekës fëminore në Bibliotekën Kombëtare


Më datë 23 dhjetor, për herë të parë në Shqipëri, në mjediset e Bibliotekës Kombëtare u çel “Java e bibliotekës fëminore”. Kjo javë promovuese synon nxitjen dhe edukimin e procesit të leximit te fëmijët. Ajo është vetëm fillimi i një programi më të gjerë e të strukturuar që do të vijojë vitin e ardhshëm edhe me veprimtari të tjera të ngjashme. Në prani të Ministres së Kulturës znj. Mirela Kumbaro dhe Shefes së Zyrës së Marrëdhënieve me Publikun të Ambasadës Amerikane znj. Valeri O’Brien, në një prej hapësirave më interaktive të BKSH, siç është American Corner, fëmijët u bënë lexues të privilegjuar. Drejtoresha e BKSH, znj. Persida Asllani, mbasi u uroi fëmijëve mirëserdhjen, i ftoi Znj. Kumbaro dhe znj. O’Brien, të ftuarat e para, ta hapnin këtë javë duke lexuar secila nga një libër të përzgjedhur prej tyre.

Përmes stafit të specializuar të BKSH-së, vullnetarëve të shumtë dhe të ftuarve nga jeta publike, do të zhvillohen sipas një kalendari të përcaktuar dhe të shpallur seanca leximi nga letërsi e përzgjedhur për fëmijë, në vijim të programit vjetor të zhvilluar në American Corner (veçanërisht kids club – për grupmoshat 4-14 vjeç - promovuar edhe përmes facebook-ut). Ky program zhvillohet në datat 23 deri 29 dhjetor.

Këtë vit, ky aktitivitet bëhet në bashkëpunim me Ambasadën Amerikane në Tiranë, duke ofruar lexime dhe një atmosferë ilustruese nga bota e librit amerikan, me personazhet letrarë më të njohur e të dashur për fëmijët. Do të dhurohen gjithashtu libra dhe CD me këngë festive për fëmijë.