Ngjarje

Një mbrëmje për Ismail Kadarenë


Biblioteka kombëtare, në bashkëpunim me Shtëpinë botuese Pegi, kremtoi në mënyrë simbolike më 28 janar ditëlindjen e shkrimtarit Ismail Kadare përmes një mbrëmjeje të veçantë në praninë e studiuesve dhe lexuesve të tij. Përvojat personale dhe profesionale të studiuesve të afirmuar të shkrimtarit por edhe të studiuesve të rinj u sollën për publikun përmes një bashkëbisedimi të hapur ku ligjërimi letrar dhe ai për letërsinë u shkrinë në një homazh dhe urim për ditëlindjen e shkrimtarit.

Për të pranishmit, u hap edhe një ekspozitë e veçantë, konceptuar nga sektori i bibliografisë përmes kurioziteteve bibliofilike, e cila u kushtohej botimeve të hershme por edhe të rralla të Ismail Kadaresë. Si një institucion i librit dhe kulturës, BKSH mirëpriti edhe prezantimin e Bibliografisë më të fundit kushtuar veprës së autorit nga studiuesja e re Jorina Kryeziu, bibliografi e botuar nga Botimet Pegi dhe e mbështetur në pasurimin e saj nga sektorë të ndryshëm të BKSH-së. Takimi vijoi me disa diskutime mjaft interesante në lidhje me përvojat e punës bibliografike nga studiues të ndryshëm. Dr. Lili Sula, këshilluese e botimit dhe pedagoge, trajtoi më konkretisht sfidën bibliografike të këtij botimi. Ndërsa rreth përvojave të ndryshme bibliografike të punës studimore ishin ftuar të dëshmonin edhe pedagogët e Departamentit të letërsisë të Fakultetit të Historisë dhe Filologjisë (UT), Profesor Bashkim Kuçuku dhe Dr. Viola Isufaj, që të dy autorë të disa studimeve të rëndësishme mbi Kadarenë. Profesor Kuçuku trajtoi aspekte të punës bibliografike në lidhje me botimet në gjuhë të huaj të Kadaresë, marrëdhënien e ngushtë që krijohet mes studiuesit, kritikut, historianit të letërsisë dhe botimeve të autorit e studimeve ndaj tij, kryesisht në gjuhë të huaj. Viola Isufaj solli përvojën e saj mbi trajtimin e mitit nga Kadare por edhe aspekte të perceptimit të tij në leximet e studiuesve të tjerë përmes një shqyrtimi bibliografik.