Ngjarje

Homazh për balkanologun Gustav Weigand


Biblioteka Kombëtare i kushtoi ditën e premte, më 27 shkurt, një vëmendje të veçantë kontributit dhe personalitetit shkencor të balkanologut gjerman Gustav Weigand, me rastin e 155-vjetorit të lindjes. Gustav Weigand (1860-1930), si kontribues i shquar në studimet ballkanologjike, hartues atlasesh gjuhësore, hulumtues i marrëdhënieve mes gjuhëve e kulturave të popujve ballkanikë, vështruar në kontekstet e tyre historike e etno-folklorike, zuri një vend të rëndësishëm edhe në debatet shkencore mbi historinë e gjuhës shqipe. Interes të veçantë patën 12 argumentet e tij mbi prejardhjen e saj prej trakishtes. Ky studim u publikua pak vite para se ai të ndahej nga jeta, më 1927 në “Balkan Archiv”, dhe botua po atë vit në revistën “Diturija” nga Aleksandër Xhuvani. Për gjuhën shqipe G. Weigand njihet edhe për Gramatikën e gjuhës shqipe, 1913 dhe Fjalor shqip-gjermanisht e gjermanisht-shqip, 1914.

Ekspozita “Biblioteka e një balkanologu” u mendua gjithashtu si një homazh edhe ndaj gjestit sa shkencor aq edhe qytetar të Weigand-it, i cili, në vitin 1929, i dhuroi Bibliotekës kombëtare të Shqipërisë 81 tituj të koleksionit personal albano-balkanologjik. Përmes këtij përkujtimi BKSH zgjodhi të shpallte dhe vitin e 95-vjetorit të themelimit të saj si vit i dhurimeve për pasurimin e fondeve albano-balkanologjike.

Ekspozita u shoqërua me një referim shkencor kushtuar kontributit gjuhësor të Weigand-it nga balkanologu Prof. Dr. Dhimitri Bello (Universiteti i Tiranës), e veçanërisht mbi veprën “Etnografi e Maqedonisë”, falë vlerave historike, etnografike e gjuhësore që ajo përfaqëson.

Ligjërata e plotë e Dhimitri Bellos