Ngjarje

Prezantim dhe ekspozitë në kuadër të librit “Historia e Austrisë”


Biblioteka kombëtare në bashkëpunim me Shtëpinë botuese “Dituria” dhe Ambasadën e Austrisë në Tiranë zhvilloi më 16 mars një takim kushtuar botimit në shqip të “Historisë së Austrisë”, me autor historianin e mirënjohur Prof. Alois Niederstätter. Të pranishmit u përtshëndetën nga shkëlqesia e tij z. Thomas Schnöll, i cili theksoi kënaqësinë e veçantë të botimit të këtij libri në shqip si shenjë simbolike e forcimit të mëtejshëm të njohjes reciproke që karakterizon dy popujt tanë. Drejtoresha e Bibliotekës kombëtare Prof. Persida Asllani theksoi rolin e Austrisë në themelimin e fondit fillestar të Bibliotekës së ardhshme kombëtare që në vitin 1917. Ajo prezantoi ekspozitën e përgatitur me këtë rast për të ftuarit, në të cilën paraqitej kontributi i albanologëve austro-hungarezë dhe austriakë në themelimin dhe zhvillimin e albanologjisë si edhe pjesa më e rëndësishme e letërsisë austriake e përkthyer në gjuhën shqipe. Rëndësia dhe kontributi i veçantë i Austrisë në demokratizimin dhe modernizimin e shoqarisë shqiptare dhe të strukutrave të shtetit shqiptar, veçanërisht në bashkohësinë tonë u trajtuan për të pranishmit gjatë ligjëratës së z. Valter Ibrahimi, ish-ambasador i Shqiperise në Vjenë, aktualisht këshilltar diplomatik pranë Presidentit të Republikës. Një informacion më të gjerë për autorin dhe një analizë të plotë për librin e solli historian i Qendrës së Studimeve Albanologjike Dr. Edmond Malaj. Duke falenderuar të pranishmit, Zoti Petrit Ymeri, botuesi i librit dhe njëkohësisht kryetari i Shoqatës së botuesve, e cilësoi këtë botim si një nga gjërat më të çmuara në kolanën e tij të mirënjohur të historive të shteteve të Europës.