Ngjarje

Ekspozita NOLI / KONICA – Albumi i një bashkohësie


Biblioteka kombëtare përuroi më 30 mars, në prani të Ministres së Kulturës znj. Mirela Kumbaro dhe shumë të ftuarve, ekspozitën NOLI / KONICA – Albumi i një bashkohësie, e cila iu kushtua dy figurave të shquara të jetës kulturore, letrare, politike e shoqërore të mbarë botës shqiptare, që nga kolonitë e largëta e deri te zemra e saj në Ballkanin e ndërliqshëm. Drejtoresha e BKSH-së, Prof. Persida Asllani, tha në fjalën e hapjes se pikërisht në përkujtim të 50-vjetorit të vdekjes së Fan Nolit dhe 140-vjetorit të lindjes së Faik Konicës (13 dhe 15 mars), Biblioteka kombëtare i propozon publikut një qasje të veçantë, e cila ndjek dialogun kompleks që karakterizoi të dy personalitetet poliedrike, duke vënë në dukje njëkohësisht kontributet e tyre të përbashkëta si shkrimtarë, përkthyes, kritikë letrarë e kritikë socialë, dijetarë të hollë në debatet ndërkombëtare të kulturës botërore por edhe polemistë të fuqishëm ndaj zhvillimeve politike jo vetëm Shqiptare por edhe rajonale e europiane”.

Në përshëndetjen e saj Ministria e Kulturës tha se “janë të pakta mendjet intelektuale shqiptare të shekullit të kaluar që të jenë kaq të pranishëm sa Konica e Noli, si në bibliotekat tona mendore ashtu dhe në rrjetet sociale shqiptare. – Ajo theksoi gjithashtu se kjo gjë dëshmon, përpos të tjerash, “se sa universalë janë ata, sa largpamës kanë qenë, sa mirë e njohën Shqipërinë ndonëse s’e jetuan çdo ditë, dhe se komunikimi shpirtëror, intelektual, kulturor është dimensioni më i rrokshëm, por edhe shërbimi më i madh që mund t’i bëjmë kombit”.

Kjo ekspozitë është konceptuar në trajtat e një albumi sekuencial, në tekste dhe imazhe që përzgjedhin rrugëtimet dhe pikëtakimet mes dy personaliteteve. Ajo synon të jetë një homazh admirues por dhe vështrim thellues mbi dy figura të papërsëritshme si Noli e Konica. Koncepti i saj shpie natyrshëm te një bashkohësi e dyfishtë, ajo realja, ndërmjet tyre, dhe ajo e sotmja, po aq fuqimisht reale, me të tashmen tonë.

Ekspozita do të “udhëtojë” edhe drejt Prishtinës dhe do të hapë dyert e saj në mjediset e Bibliotekës kombëtare të Kosovës për publikun kosovar, gjatë “javës së bibliotekave” në kuadër të protokollit të bashkëpunimit kulturor Shqipëri-Kosovë.