Ngjarje

Ligjëratë e shkrimtarit dhe historianit belg Geert Van Istandael në BKSH


Paraditen e 31 marsit, Biblioteka kombëtare pati të ftuar nderi shkrimtarin, poetin, eseistin dhe historianin Geert Van Istandael. Të pranishmit patën mundësinë të ndjekin një leksion të hapur jo thjesht rreth historisë së Belgjikës por të sfidave të brendshme të shoqërisë belge dhe modeleve komplekse që ajo i ofron sot Europës së Bashkuar dhe botës përmes vetë ekzistencës të saj. Kufiri linguistik dhe kaosi hapësinor, lavdia industriale e Valonisë dhe mjerimi i Brukselit, koterij-i flamand dhe kullat e Gentit, Filipi II dhe Vilhelmi I, e zeza dhe e bardha, pacifizmi i djathtë dhe konservatorizmi i majtë, nga Jul Cezari te Bart de Ëever, nga Karli i Madh tek Elio di Rupo – u sollën përmes ligjëratës së pasur të një prej autorëve më të suksesshëm sot në Belgjikë dhe Europë, i cili, me një stili elegant por atipik, sfidon lexuesit dhe auditoret me pikëpyetjet që ngre parreshtur, me paradoket provokuese dhe stilemat befasuese, si mënyra më e mirë për të mbajtur të gjallë kujtesën, qendrimin kritik, shpritin bashkëveprues dhe mendjen e hapur europiane.

Në fjalën e mirëseardhjes drejtoresha Persida Asllani e krahasoi figurën e Geert Vaan Istandael si një “i ngjashëm” i një kohe tjetër me dy figurat që në të njëjtën kohë po përkujton Institucioni që ajo drejton, Noli e Konica, pena qendrore të letrave shqipe por edhe sfidantë të fuqishëm brendashkruar kontradiktave shqiptare.

E pranishme për herë të dytë në Bibliotekën Kombëtare të Shqipërisë, shkëlqesia e saj, Ambasadorja e Mbretërisë së Belgjikës, rezidente në Sofie, zonja Anick Van Calster, në fjalën e saj të përshëndetjes, mbasi falenderoi Bibliotekën Kombëtare për mikpritjen, e cilësoi këtë takim si një refleksion të përbashkët rreth filozofisë që qendron në zanafillë të BE-së.