Ngjarje

Java e Bibliotekës në Kosovë - 2008

 

Një delegacion i Bibliotekës Kombëtare të Shqipërisë, i kryesuar nga drejtori i saj Dr. Aurel Plasari, nga data 14 deri më 16 prill 2008 mori pjesë në edicionin VI të Javës së Bibliotekës në Kosovë. Veprimtaria u organizua nga Biblioteka Kombëtare dhe Universitare e Kosovës (BKUK) dhe Ambasada e ShBA-ve në Prishtinë dhe u shënua si ngjarje me rëndësi jo vetëm për bibliotekat, por edhe për jetën kulturore dhe shkencore në Kosovë. I rëndësishëm ishte fakti që kjo veprimtari sivjet për herë të parë u organizua në Kosovën shtet i pavarur.
Moment i rëndësishëm i veprimtarisë ishte nënshkrimi solemn i Aktit të Ri të Marrëveshjes së Bashkëpunimit midis Bibliotekës Kombëtare të Shqipërisë dhe Bibliotekës Kombëtare dhe Universitare të Kosovës, e cila shënon një stad të ri marrëdhëniesh institucionale në kushtet e zhvillimeve të reja sidomos në Kosovë. Në ceremoninë e nënshkrimit morën pjesë autoritete të larta të shtetit të Kosovës, personalitete të jetës kulturore dhe shkencore të Prishtinës, punonjës të bibliotekave etj.
Me interes u ndoq nga të pranishmit edhe promovimi i botimit të veprës “Hyrje në indoeuropianistikë. Leksione të Prishtinës” të Eqrem Çabejit. Në prezantimin e botimit Dr. Plasari spikati faktin që botimi i kësaj vepre paraqet një ndër rastet fatlume kur vepra gjen botuesin e duhur: të përkushtuar dhe profesionist. Bëhet fjalë për shtëpinë botuese “Çabej”, të drejtuar nga e bija e Çabejit, znj. Brikena Çabej, e cila mori pjesë në këtë promovim. Ajo, pasi falënderoi drejtuesit e të dy bibliotekave për simbolikën e gjetur të këtij promovimi, u ndal në lidhjet jo vetëm shkencore, por edhe shpirtërore të Prof. Çabejit me Kosovën. Të pranishmit, mes të cilëve edhe ish-studentë të akademikut të shquar që i kishin ndjekur këto leksione në vitet ’70, sollën mbresat dhe kujtimet e tyre.
Në kuadër të kësaj veprimtarie u mbajt në bibliotekën ndërkomunale të Prizrenit edhe seminari “Bibliotekat digjitale”. Znj. Karen Coyle, konsulente për bibliotekat digjitale në Universitetit e Kalifornisë mbajti referatin “Bibliotekat digjitale – si të përdoret mënyra digjitale për ruajtjen dhe katalogimin e librave të rrallë dhe të vjetër”. Ngjallën interes edhe temat e specialistëve nga Shqipëria: “Bibliotekat digjitale – realitet hyrjeje edhe për kulturën shqiptare” nga Etleva Domi, zv/drejtore e BKSh-së, dhe “Domosdoshmëria e strategjisë së zhvillimit të bibliotekave publike në epokën digjitale” nga Ramazan Vozga, inspektor i Qendrës së Trajnimit Bibliotekar.