Ngjarje

Ekspozita Noli/Konica, në “Javën e bibliotekave në Kosovë”
14-18 prill 2015


Në kuadër të aktiviteteve kushtuar Javës së Bibliotekës në Kosovë ekspozita Noli/Konica, album i një bashkëkohësie, organizuar dhe përuruar në Bibliotekën Kombëtare të Shqipërisë gjatë muajit mars, udhëtoi drejt Prishtinës dhe shenjoi hapjen e një vargu të gjatë e me shumë interes veprimtarisht për bilbiotekat dhe bibliotekonominë. Ky është edicioni i XIII i kësaj jave, e cila organizohet falë bashkëpunimit të Bibliotekës Kombëtare të Kosovës dhe Ambasadës Amerikane në Prishtinë, nga 14 deri më 18 prill.

Në seancën solemne të hapjes së kësaj jave, mbas fjalës së Ushtruesit të detyrës së drejtorit të BKK “Pjetër Bogdanit”, zotit Tefik Mehmeti, i cili theksoi se Java e bibliotekës në Kosovë është shprehje e vullnetit dhe e përkushtimit të komunitetit bibliotekar për t’u bashkuar në idenë si të zhvillohen këto institucione, si të grumbullohet, përpunohet e ruhet kultura e dija e shkruar dhe e shtypur, përshëndetën në emër të Ambasadës së ShBA-së në Kosovë zoti Jeffrey Jamison, drejtor i Sektorit për marrëdhënie me publikun dhe në emër të komunitetit bibliotekar të Shqipërisë drejtoresha e Bibliotekës Kombëtare Prof. Dr. Persida Asllani.

“Bibliotekat duhet të dëshmojnë se janë të rëndësishme për njerëzit dhe komunitetin ku veprojnë” - u shpreh z.Jamison, ndërsa zonja Asllani e cilësoi komunikimin përmes librit si një nga proceset njohëse më të sigurta e shpesh edhe estetike (duke iu referuar veçanërisht në formë homazhi botimeve të “Rilindjes” së Prishtinës) dhe e ftoi publikun e Prishtinës të çmojë veprën, dorëshkrimet, fotografitë e shkrimet publicistike të dy figurave të shquara letrare, politike e shoqërore të mbarë botës shqiptare.

Dita e parë e “Javës së bibliotekave në Kosovë”, e cila këtë vit i kushtohet zhvillimit e mendimit profesional në mbledhjen, përpunimin dhe ruajtjen e koleksioneve të rralla dhe të vjetra, vijoi me ligjërata nga e ftuara speciale, zonja Carrie Marsh, drejtoreshë e bibliotekave dhe koleksioneve të veçanta të “The Claremont Colleges” në Claremont të Kalifornisë së ShBA-së. Ajo argumentoi se të gjitha materialet e rralla që hyjnë në kategorinë e koleksioneve të veçanta duhet të jenë të disponueshme për përdoruesit, por sipas procedurash të veçanta. Ndërsa në ligjëratën e saj, Dr. Etleva Domi, nëndrejtoreshë e BKSH-së, trajtoi aspekte të “Trashëgimisë kulturore kombëtare në arenën e ‘demokracisë’ digjitale”, etj.

Gjatë kësaj jave do të organizohen veprimtari kulturore të veçanta në Bibliotekën Kombëtare të Kosovës “Pjetër Bogdani” në Prishtinë, në bibliotekat rajonale të Prizrenit, të Gjilanit dhe të Pejës, duke përfshirë këtu edhe aktivitetet në Këndin Amerikan në Prishtinë e Prizren.