Ngjarje

Dita botërore e librit dhe MOBI DIK në Bibliotekën Kombëtare
23 prill 2015, ora 18:00


Duke vijuar traditën e kremtimeve letrare të 23 Prillit, Ditës botërore të librit dhe të drejtës së autorit, Biblioteka Kombëtare, nismëtare e këtij aktiviteti në Shqipëri që në vitin 2003, organizoi në bashkëpunim me Ambasadën Amerikane në Tiranë dhe Shtëpinë botuese Zenit një mbrëmje letrare kushtuar një prej autorëve të shquar e themelues të letërsisë amerikane, Herman Melville, dhe romanit të tij të famshëm “Mobi Dik”, përkthyer së fundmi i plotë edhe në gjuhën shqipe nën përkthimin mjeshtëror të Rudi Erebarës.

Përse Melvili në Ditën e librit? Ç’do të thotë për një lexues amerikan të lexosh Mobi Dikun sot? Si lidhet ai përmes fillit të artë të letërsisë me penat e mëdha të letërsisë botërore? Cilat janë sfidat dhe përvojat më mbresëlënëse të përkthimit të tij në shqip? Enigmat e interpretimit? Limitet e shqipërimit? Ç’pasuri filmografike solli romani në kinemanë botërore? etj, ishin disa nga çështjet dhe pyetësimet që u shtruan në shoqërinë e lexuesve të tij të pasionuar mbasditen e 23 prillit në sallën Amerikane të Bibliotekës kombëtare, përmes bashkëbisedimit me Persida Asllanin (Drejtore e BKSH-së), Valery O’Brien (Shefe e Zyrës së marrëdhënieve me publikun në Ambasadën amerikane), Krenar Zejnon (Botues, kritik e poet), Rudi Erebaran (përkthyesi, poet e romancier), Bora Yllin (kineaste dhe kritike e kinemasë). Ky aktivitet shenjoi edicionin XIII të Ditës botërore të librit në Shqipëri pikërisht përmes iniciativës së Bibliotekës Kombëtare.