Ngjarje

Dita Botërore e Lirisë së Shtypit në Bibliotekën Kombëtare


Duke kremtuar Ditën botërore të lirisë së shtypit, Biblioteka Kombëtare në bashkëpunim me Departamentin e Gazetarisë dhe Komunikimit (Universiteti i Tiranës), organizuan më 30 Prill një refleksion të përbashkët mbi parimet themelore të lirisë së shtypi dhe mbi rrugëtimin e shtypit shqiptar në kërkim e thellim të lirisë.

Ky bashkëpunim solli dy pamje të rëndësishme dhe përplotësuese të historisë dhe gjendjes së shtypit në Shqipëri e në botë përmes ekspozitës “Drejt lirisë...” dhe konferencës shkencore “Nga censura te liria”.

Në përurimin e ekspozitës, drejtuesja e BKSH-së, Prof. Dr. Persida Asllani, e cilësoi lindjen e shtypit dhe të fjalës së lirë në realitetin shqiptar si një shpallje publike e kërkimit të lirisë, bashkëshoqëruese e proceseve kombformuese shqiptare, e shndërruar mbas njohjes së Shtetit të ri në hapësirën ku u shprehën aktet më thelbësore të lirisë së shtetasve të tij.

Në fjalën e tij, Prof. Ass. Mark Marku, pedagog i Departamentit të Gazetarisë dhe njëkohësisht gazetar i njohur, sqaroi se Ekspozita “Drejt lirisë...” u kushtohej zhvillimeve më dramatike, që nga lindja e vetëdijes etike të shtypit, te përpjekja për modernizim në vitet ‘30, por edhe gjatë luftës, diktaturës, e deri te dritëhijet që e shoqëruan në tranzicionin postkomunist.

Konferenca “Nga censura te liria” trajtoi pamje të ndryshme të realiteteve mediatike në Shqipëri, që nga thelbi ontologjik e deri te casus-et specifike si shprehje e një rrugëtim i pandalshëm drejt lirisë. Sprovat nëpër të cilat eci Media shqiptare, nga shekulli XIX deri te ai XXI, gjykohen sot si gjurma më e plotë e procesit emancipues të saj dhe të vetë shoqërisë. Konferenca u hap në mënyrë simbolike nga ligjërata e Përgjegjësit të Departamentit të Gazetarisë dhe Komunikimit dhe filozofit Prof. Dr. Artan Fuga, i cili parashtroi pamje të shumta të censurës nga perspektiva analizuese e psikanalizës. Në programin e kësaj konference referuan:

Artan Fuga
"Lindja e një diktature - Kur shteti bëhej garant për cilësinë e botimeve"

Mark Marku
"Regjimet politike dhe sistemi i shtypit"

Maksim Gjinaj

"Shtypi retrospektiv shqiptar"

Nevila Nika
"Polemika në shtypin shqiptar të viteve '30 - rasti Ismet Toto"

Herald Saraçi
"Mustafa Qulli - Drita e Popullit”

Arben Muka
"Instrumentet e mbikëqyrjes së rreptë për median shqiptare 1939-1944"

Agron Gjekmarkaj
“Shtypi i emigracionit si hapësirë lirie”

Persida Asllani
“Mitologji në Media”