Ngjarje

Mbrëmja poetike Aragoni –poeti i një mijë perspektivave
BKSH, 14 maj 2015


Në vijim të aktiviteteve në nxitje të leximit dhe shkëmbimit mes kulturave, në mjediset e Bibliotekës Kombëtare u zhvillua mbasditen e 14 majit mbrëmja poetike me temë: Aragoni –poeti i një mijë perspektivave.

Kjo mbrëmje, e koordinuar nga Prof. Dr. Saverina Pasho dhe e realizuar falë bashkëpunimit të BKSH-së me Departamentin e Gjuhës Frënge të Fakultetit të Gjuhëve të Huaja dhe Aleancës Franceze të Tiranës, u gjallërua nga profesorët e këtij departamenti, Z. I. Lëngu dhe Znj. B. Kuçuku si dhe nga Ambasadori i Francës në Tiranë, Z. Bernard Fitoussi. Tre oratorët sollën aspekte të ndryshme nga jeta dhe vepra e Aragonit, këtij personaliteti kompleks e paradoksal që shpesh është cilësuar si poeti më i madh i shekullit XX.

Profesor Ilia Lengu, studiues dhe përkthyes i poetit, solli përmes të tjerash receptimin dhe leximin e ndryshëm të veprës së Aragonit në diktaturë dhe në Shqipërinë e hapur dhe demokratike. Bora Kucuku, pedagoge e letërsisë franceze, solli me fjalën e saj atmosferën e surealizmit në Francë dhe pozicionimin e Aragonit në këtë shkollë, pa kursyer kritikat ndaj poetit në një këndvështrim aktual.

Shkëlqesia e tij, Zoti B. Fitoussi e mori fjalën për të komentuar veprën e Aragonit në një mënyrë të veçantë e plot pasion, duke recituar disa poema të përzgjedhura nga ai vetë.

Një freski të veçantë i sollën mbrëmjes intermexot me recitimet e studenteve të talentuara e të pasionuara të Departamentit të Frëngjishtes.

Mbrëmja u mbyll nën tingujt e këngëve të Ferrat e Ferre që kenduan vargjet e Aragonit, me vizitën e ekspozitës me veprat e Aragonit të përgatitur nga Biblioteka Kombëtare.