Ngjarje

In memoriam Koliqi / Camaj
BKSH, 25 maj 2015


Në Bibliotekën Kombëtare, u zhvillua pasditen e 25 majit ne mjediset e BKSH-së, si një aktivitet kushtuar dy shkrimtarëve të çmuar dhe dy personaliteteve të shquara të botës kulturore shqiptare, pikëpjekja më frytdhënëse e të cilëve, veç ajo mes shkrimesh e fatesh, mbetet revista “Shêjzat”, një ndër revistat kulturore më të ndritura të diasporës mbarëkombëtare.

Në këtë përkujtim Biblioteka Kombëtare mirëpriti, në prani të Ministres së Kulturës së Shqipërisë, zonjës Mirela Kumbaro dhe shumë të ftuar nga bota universitare dhe akademike, ligjëratën e Ministrit të Kulturës së Republikës së Kosovës, studiuesit dhe Prof. Assoc. Dr Kujtim Shala, autor ndër shumë studime e botime edhe i librit “Ernest Koliqi: Authentica et Urbana”.

Në fjalën e mirëseardhjes, drejtorja e Bibliotekës Kombëtare, Prof. Dr. Persida Asllani e cilësoi pikëpjekjen mes dy autorëve si përkim fatlum për jetën e letërsisë dhe kulturës shqiptare. Roli promotor i Ernest Koliqit në organizmin dhe komunikimin kulturor të diasporës shqiptare, koordinimi mes intelektualëve shqiptarë jashtë kufijve të Shqipërisë diktatoriale, bashkësisë arbëreshe si dhe botës intelektuale të Kosovës, u vijua dhe u përforcua edhe me kontributin e Martin Camajt, si studiues, kritik dhe njeri i letrave, duke e shndërruar revistën “Shêjzat” në një tribunë të mendimit dhe kulturës së lirë shqiptare.

Në përshëndetje e saj, Ministrja e Kulturës, Zonja Kumbaro e cilësoi mjaft frytdhënës bashkëpunimin dhe koordinimin mes institucionesh të të dy vendeve dhe e konsideroi “In memoriam-in” kushtuar Koliqit e Camajt si një nga pamjet e shumta të shërbimit të përbashkët që i bëhet kulturës sonë mbarëkombëtare.

Ligjërata e Prof. Kujtim Shalës u ndoq më shumë interes nga të pranishmit, një auditor i përzgjedhur akademikësh, universitarësh, studentësh dhe njerëz të medias. Në të u parashtrua ngjizja dhe rrugëtimi i shkrimit koliqian përmes dy nyjesh të rëndësishme të veprës së vet letrare, të sjella nga studiuesi përmes sintagmës authentica et urbana, përmes leximit të një Koliqi nxënës të hershëm të Fishtës dhe njëkohësisht mësues të hershëm të modernitetit shqiptar. Në shenjë mirënjohjeje dhe vlerësimi, zonja Asllani i dha zotit Kujtim Shala, në emër të Institucionit që ajo drejton, një medaljon të Bibliotekës Kombëtare.

Aktiviteti vijoi me përurimin e një ekspozite të organizuar nga Biblioteka kombëtare, në të cilën u prezantua për të pranishmit një kolazh me botimet e para e të rralla të autorëve dhe të Revistës “Shêjzat”, nga fondi i BKSH-së.

Pjesa e dytë e “In memoriam”-it vijoi me prezantimin e librit “Kritika letrare në Shêjzat – E. Koliqi, M. Camaj” nga një prej autorëve të tij, Prof. Dr. Ymer Çiraku, pedagog i Universitetit të Tiranës, dhe zv. Dekan i Fakultetit të Historisë dhe Filologjisë. Në prezantimin e tij, Prof. Çiraku e cilësoi rolin e revistës “Shêjzat” dhe shkrimet kritike të dy shkrimtarëve, njëkohësisht studiues, të ngjashëm me rolin e revistës “Albania” të Konicës dhe shkrimeve të tij me natyrë kritiko-letrare. Autorët e këtij libri ( Ymer Çiraku dhe Elona Plaku), përveç trajtimit kritik dhe analizës së kontributit konkret të shkrimeve kritike të Koliqit dhe Camajt, e kanë plotësuar botimin edhe me një bibliografi shteruese të shkrimeve të Koliqit dhe Camajt të botuara në revistën “Shejzat”.