Ngjarje

Ambasada Ruse i dhuron Bibliotekës Kombëtare 67 vepra Balkano-Albanologjike
7 korrik 2015


Në sallën elegante “Lumo Skëndo” të Bibliotekës Kombëtare u zhvillua më 7 korrik ceremonia e dhurimit të librave nga ana e ambasadës Ruse, me rastin e thirrjes për donacione në kuadër të 95-vjetorit të themelimit të BKSH-së.

Pjesëmarrës në aktivitetin e zhvilluar ishin shkëlqesia e tij ambasadori rus zoti Alexander Romanovich Karpushin , drejtoresha e Bibliotekës Kombëtare, zonja Persida Asllani, zv.Ministri i Ministrisë së Kulturës, zoti Zef Çuni, si dhe përfaqësues nga ambasada ruse, pedagogë e studentë, studiues të ndryshëm, anëtarë të shoqatës së miqësisë shqiptaro-ruse etj.

Zonja Asllani në fjalën e saj theksoi ndër të tjera vlerën e gjestit dhurues të librave si një nga format më të bukura të shkëmbimit mes kulturave dhe mjediseve shkencore. Ajo vuri gjithashtu të pranishmit në dijeni se në shenjë simbolike respekti edhe vetë Biblioteka Kombëtare kishte ekspozuar në të njëjtën ditë disa nga veprat kryesore të themelueses së albanologjisë ruse, së mirënjohurës Prof. Desnickaja.

Ambasadori rus, zoti Alexander Romanovich Karpushin, nga ana e tij shprehu kënaqësinë e veçantë për këtë bashkëpunim. Ai i cilësoi librat e dhuruar si të përzgjedhur në mënyrë shumë të kujdesshme dhe që trajtojnë çështje të marrëdhënieve të rëndësishme balkanologjike, me natyrë linguistike, etnolinguistike, historike, gjeopolitike etj, duke përfshirë edhe studime të shquara mbi çështje të ndryshme të gjuhës shqipe.

Ceremonia u përshëndet edhe nga zv. Ministri i Ministrisë së Kulturës, z. Çuni, i cili e cilësoi këtë dhurim si një vijimësi të bashkëpunimit dhe njohjes së kulturave mes dy vendeve.