Ngjarje

Biblioteka Kombëtare përkujton 155-vjetorin e lindjes së Kolë Idromenos
12 – 30 gusht, 2015


Në Bibliotekën Kombëtare më datën 12 gusht 2015, me rastin e 155-vjetorit të lindjes së piktorit Kol Idromeno, është çelur ekspozita përkujtuese “Kolë Idromeno, në fondin e Bibliotekës Kombëtare”.

Në këtë ekspozitë prezantohen për herë të parë materiale, të cilat paraqesin një interes të veçantë për lexuesit dhe artdashësit, si albume, vepra dhe artikuj publicistikë të botuara në shtypin e kohës, etj.. Si një ftesë ndaj lexuesve për t’u njohur më mirë me këtë figurë madhore të artit shqiptar, ekspozita vjen e konceptuar në tre pika kyçe dhe më të rëndësishmet e krijimtarisë së Idromenos, si nismëtar i kinematografisë shqiptare, arkitekt dhe piktor.

Vepra të tilla si “150 vjet fotografi shqiptare”, (2009) “Shfaqjet e para kinematografike”, (2007) “Kolë Idromeno, arkitekt” (2012), “Kolë Idromeno, jeta dhe vepra” (1984), si dhe një sërë artikujsh kritikë të botuara në shtypin e kohës, të cilat janë të arkivuara në fondin e Bibliotekës Kombëtare, do të ekspozohen për publikun gjatë ditëve në vijim.

Idromeno, babai i kryeveprës shqiptare “Motra Tone”, lindi më 15 gusht 1860 në Shkodër dhe konsiderohet si një prej piktorëve më të mëdhenj të shkollës shkodrane të Arteve Pamore.

Nxënës i Marubit, ai njihet gjithashtu si arkitekt, urbanist, fotograf, skenograf, siparist, muzikant e kompozitor këngësh shkodrane, duke lënë gjurmë në shoqerinë dhe artin shqiptar. Puna dhe vepra e tij do të konsiderohet edhe si fillesa e shfaqjeve të para kinematografike në Shqipëri. Idromeno u nda nga jeta më 12 dhjetor 1939 duke lënë pas vepra të rëndësishme si “Dasma shkodrane”, Pusija", "12 luftëtarët e Pragës në lundër", Autoportreti", "Portret i një fshatari", "Bariu", "Ftyrë fshatari", etj.


Ekspozita do të qëndrojë e hapur për të gjithë vizitorët, në hollin e Bibliotekës Kombëtare, nga dt.12 deri 30 gusht 2015, nga ora 8:00 – 20.00, dhe gjatë fundjavës nga ora 08:00 – 14.00.