Ngjarje

Dita Botërore e Librit në Bibliotekën Kombëtare

 

 

Në ceremoninë e festimit të Ditës Botërore të Librit, më 23 prill 2008, në Bibliotekën Kombëtare – traditë tashmë disavjeçare - morën pjesë Ministri i Turizmit, Kulturës, Rinisë dhe Sporteve Ylli Pango, Ministri i Arsimit dhe Shkencës Genc Pollo, përfaqësues të Trupit diplomatik, personalitete të kulturës, miq të librit, botues, bibliotekarë, etj.
Pasi mirëseardhi të pranishmit, Dr. Aurel Plasari theksoi faktin që Biblioteka Kombëtare për të shtatin vit radhazi organizon një ceremoni të tillë si institucioni që e ka përfshirë Shqipërinë në vendet që festojnë këtë ditë të shënuar të kulturës botërore. Duke falënderuar Ministrinë e Turizmit, Kulturës, Rinisë dhe Sporteve që zgjodhi pikërisht këtë ditë për shpalljen e fituesit të çmimit kombëtar të bibliofilisë “Lumo Skendo”, ai njoftoi se Juria që ai drejtoi ia akordoi këtë çmim në edicionin e tij të dytë shtëpisë botuese “Onufri” për dy vëllimet e para të botimit të veprës së shkrimtarit Ismail Kadare. Siç dihet, ky çmim u jipet botimeve me vlera bibliofilike me elemente të spikatura të kulturës së botimit dhe të realizimit tipografik, por edhe intelektuale.
Duke marrë çmimin, drejtori i shtëpisë botuese “Onufri” Bujar Hudhri, pasi vlerësoi rëndësinë e këtij çmimi të rëndësishëm në kulturën shqiptare, falënderoi Jurinë për vlerësimin e bërë punës dhe përkushtimit të veprimtarisë së tij botuese.
Ngjalli interes, në kuadrin e “Vitit Çabej”, dhurimi nga ana e znj. Brikena Çabej i një deklarate të dorëshkruar nga Eqrem Çabej sipas së cilës dëshmohet dëshira e albanologut të shquar Norbert Jokli që gjithë pasurinë e tij shkencore (me dorëshkrime, bibliotekë etj.) t’ia falte popullit shqiptar.
Pjesëmarrësit në ceremoni, nën tingujt e kuartetit të harqeve, morën pjesë edhe në koktejlin e organizuar me këtë rast.