Ngjarje

Homazh për akademikun Aleksandër Stipçeviç në Bibliotekën Kombëtare


Në Bibliotekën Kombëtare më datën 2 shtator 2015 u çel ekspozita përkujtimore “Aleksandër Stipçeviç (1930–2015)”, si një homazh kushtuar akademikut kroat, me prejardhje nga arbneshët e Zarës, i ndarë nga jeta dy ditë më parë. Kjo ekspozitë vjen për publikun e gjerë dhe lexuesit e Bibliotekës Kombëtare si një vëmendje e veçantë kushtuar kontributit dhe personalitetit të tij shkencor, veçanërisht në fushën e ilirologjisë. Aleksandër Stipçeviç, i njohur si arkeolog, bibliograf, albanolog, historian, bibliotekar, prej më shumë se 40 vjetësh do t’i përkushtohej studimeve në fushën e Ilirisë dhe albanologjisë.

“Gjarpëri si simbol religjioz te Ilirët” (1977); “Ilirët, historia, jeta, kultura, simbolet e kultit” (2002); “Kultura tradicionale e Arbëneshëve të Zarës” (2012); “Elementët parahistorike në besimet e arbëreshëve të Zarës” (2009); “Historia e librit” (2000); “Fjalori arbërish-shqip-kroatisht”, “Historia dhe bibliografia e arbëreshëve të Zarës” (1997) , etj., janë një pjesë e rëndësishme e fondit të Bibliotekës Kombëtare, të prezantuara në këtë ekspozitë.

Simbolizmi religjioz te ilirët, do të ishte pikëndalesa më e rëndësishme e punës së tij kërkimore, nga do të zinin fill edhe hulumtimet e mëtejshme në fushën e ilirologjisë dhe albanologjisë. Sipas Stipçeviç, “në simbolikën religjioze të Ilirëve, asnjë kafshë nuk ka lojtur një rol aq të rëndësishëm si gjarpri. Kjo kafshë misterioze trajtë jo të rëndomtë, e cila rrëshqet pa zhurmë dhe del nga thellësitë e tokës ku qëndrojnë demonët dhe hyjnitë e nëntokës, si dhe shpritrat e të ndjerëve”.

Mecenat i kulturës shqiptare, inicues i botimit të traditës kulturore katolike, shkencëtar me famë ndërkombëtare, iniciator dhe udhëheqës shkencor i botimit monumental të ”Illyricum Sacrum” dhe i gjithë traditës e shkrimit shqip.

Bashkëpunëtor i ngushtë i Ibrahim Rugovës dhe botës letrare në Kosovë, ai është autor i një sërë librash e studimesh pjesë e po këtij fondi mbi ilirologjinë, kultet tek ilirët, lidhjet iliro-shqiptare si edhe në fushën e albanologjisë me teza te rëndësishme mbi etnogjenezën e shqiptarëve, interpretime albanologjike etj. Një vend të veçantë do të zënë edhe studimet në fushën e redaktimeve shkencore, fjalorë, etj.


Ekspozita do të qëndrojë e hapur për të gjithë vizitorët, në hollin e Bibliotekës Kombëtare, çdo ditë nga dt. 2 shtator 2015, nga ora 8:00 – 20.00 dhe gjatë fundjavës nga ora 08:00 – 14.00.