Ngjarje

Artur Miller në 100 vjetorin e lindjes
26 tetor 2015



Në Bibliotekën Kombëtare më datë 26 tetor, me rastin e 100-vjetorit të lindjes së dramaturgut të mirënjohur amerikan, Arthur Miller, u çel ekspozita “Arthur Miller : 1915-2015”.

Në këtë ekspozitë u prezantua për herë të parë një pjesë e krijimtarisë së tij në gjuhën shqipe por edhe të huaj si “Pamje nga ura” (2012), “Ngjarja në Vishi” (1973), “Shtrigat e Salemit” (1973), “Les Sourcières de Salem : suivi de Vu du pont”, (1959), “I don't need you any more : stories” (1967), etj., si dhe një sërë artikujsh kritikë të botuara ndër vite në shtypin shqiptar.

Një vend të veçantë ze edhe miqësia e ngushtë e Arthur Millerit me fotografin e famshëm shqiptar, Gjon Milli, miqësi të cilën dramaturgu do ta kujtonte edhe në veprën e tij “Timebends” (1987). Fitues i çmimit Pulitzer më 1949, dramaturgu Arthur Miller, është ndër të paktët autorë, vepra e të cilit ndonëse kishte përplasje me ideologjinë komuniste, do të përkthehej dhe ngjitej në skenë e teatrit shqiptar.

Artur Miller (1915-2005), i lindur në New York, SHBA, do të konsiderohet edhe si përfaqësuesi më i rëndësishëm i realizmit psikologjik amerikan. Ai do të vlerësohej më 2001 me çmimin “Praemium Imperiale” akorduar nga familja perandorake e Japonisë, si dhe në vitin 2003 Çmimin e Jerusalemit.

Ekspozita do të qëndrojë e hapur për të gjithë vizitorët, në hollin e Bibliotekës Kombëtare, çdo ditë nga ora 8:00 – 20.00 dhe në fundjavë 8:00 – 14.00.