Ngjarje

Biblioteka Kombëtare prezanton koleksionin digjital të revistës “LEKA”


Biblioteka Kombëtare e Shqipërisë prezantoi gjatë Panairit Klik Ekspo Klik 2015, koleksionin e plotë të digjituar të revistës "LEKA", tanimë i publikuar në formatin e tij elektronik në faqen zyrtare të Bibliotekës Kombëtare. Revista “LEKA” i bashkohet titujve të tjerë të digjituar më herët nga Biblioteka Kombëtare, si “Albania”, (1896-1913); “Dituria” (1909-1929) dhe “Hylli i Dritës” (1921-1944), si pjesë e fondit e-Albanica, që përfaqëson Bibliotekën Digjitale Albanologjike të BKSH-së. Ky fond së shpejti do të pasurohet edhe me tituj të tjerë të rëndësishëm të historisë së periodikut shqiptar, duke i ardhur në ndihmë të gjithë studiuesve dhe dashamirësve të saj. Në e-Albanica janë përfshirë vepra të rralla të Bibliotekës Kombëtare, dorëshkrime, harta dhe periodikë, të shekujve XV-XIX në gjuhën shqipe dhe në gjuhë të tjera. Revista e përmuajshme “LEKA” është një pjesë e rëndësishme e historisë së periodikut shqiptar. Botim i Klerit Katolit shqiptar dhe organ i Shoqatës L.E.K.A. Kjo revistë u themelua më 9 dhjetor 1928 nga ish-nxënësit e Shkollës së Jezuitëve në Shkodër (Kolegja Saveriane). Ajo u ideua si një revistë mujore kulturore, politike, filozofike, shoqërore, historike, letrare, pedagogjike e folklorike. Numri i parë doli në qarkullim, si një numër i veçantë, në muajin Prill të vitit 1929. Në vitin 1941 botimi i saj u ndërpre përkohësisht, ndërsa në vitin 1942 doli një botim i veçantë me materiale arkivore e publicistike, në vijim të numrave përkujtimorë me rastin e 25-vjetorit të shpalljes së Pavarësisë së Shqipërisë. “LEKA” do të vijonte të botohej deri në vitin 1944.

Promovimi i koleksionit të digjituar të revistës “LEKA” u pasua edhe me një prezantim ‘hap pas hapi’ të Bibliotekës Digjitale dhe të shërbimeve on-line që BKSH ofron për publikun, në kuadër të leksioneve të hapura për “Aftësim në informacion”, të cilat po zhvillohen gjatë ditëve të panairit. Prezantimi i digjitimit të revistës “LEKA” dhe leksioni i hapur u ndoq me shumë interes nga studentë të Universitetit “Aleksandër Xhuvani” të qytetit të Elbasanit, të cilët u aftësuan për përdorimin e shërbimeve on-line që ofron Biblioteka Kombëtare, si Katalogu online, Katalogët e digjituar, Biblioteka Digjitale, e-Bibliografi, etj.

Biblioteka Kombëtare, gjatë Panairit Klik Ekspo Klik 2015 promovoi një nga sfidat e saj më të rëndësishme,‘Aftësimin në Informacion’, një nga principet bazë të bibliotekonomisë bashkëkohore, si një formë e re komunikimi me publikun e gjerë.