Ngjarje

Presidenti i Republikës Italiane dekoron Dr. Aurel Plasarin

 

 

Presidenti italian zoti Giorgio Napolitano i ka akorduar Dr. Aurel Plasarit Urdhrin e Meritës të Republikës Italiane (L’Ordine al Merito della Repubblica Italiana). Dekorata e lartë i është dorëzuar zotit Plasari gjatë ceremonisë së organizuar në mbrëmjen e datës 2 qershor 2008 nga Ambasada e Italisë në Tiranë me rastin e Festës së Republikës Italiane.
Në këtë ceremoni morën pjesë kryeministri i Shqipërisë z. Sali Berisha, deputetë dhe ministra, diplomatë të huaj të akredituar në Tiranë, personalitete të politikës, kulturës, arteve etj. Duke dorëzuar Urdhrin z. Saba D’Elia, ambasadori i Republikës Italiane në Tiranë, vuri në dukje se ceremonia e festës së Republikës ishte rasti më i volitshëm për dorëzimin e këtij urdhri të lartë si dëshmi e angazhimit domethënës të z. Plasari në fushën kulturore dhe, në përgjithësi, të marrëdhënieve të shkëlqyera miqësore midis Italisë dhe Shqipërisë. Personalitet i shquar i kulturës shqiptare, shkrimtar dhe përkthyes nga më të dalluarit, publicist i kthjellët dhe elokuent z. Aurel Plasari ka kontribuar në afirmimin e vlerave të kulturës europiane, në këtë kuadër veçanërisht të asaj italiane, në Shqipëri. Gjithashtu, prej një kohe të gjatë në krye të Bibliotekës Kombëtare, institucionit kryesor të kulturës shqiptare, ai ka ditur të krijojë dhe të konsolidojë marrëdhënie të ndërsjella me kulturat e popujve të tjerë.
Stafi i Bibliotekës Kombëtare shpreh gëzimin për këtë vlerësim të lartë dhe i uron z. Plasari suksese të mëtejshme në veprimtarinë e tij të shumanshme në dobi të kulturës dhe mendimit shqiptar.