Ngjarje

Kremtimi i 95-vjetorit të Bibliotekës Kombëtare dhe Çmimi “Lumo Skendo” 2013 e 2014
20 dhjetor, 2015


Duke zgjedhur fundin e vitit për të përmbyllur kremtimet e një nga ngjarjeve më të rëndësishme të kulturës shqiptare, 95-vjetorin e themelimit të saj, Biblioteka Kombëtare organizoi ditën e dielë, 20 dhjetor, një ceremoni festive në të cilën, mes shumë të ftuarve, morën pjesë kryeministri i Shqipërisë, z. Edi Rama, ministrja e Kulturës, z. Mirela Kumbaro, përfaqësues të trupit diplomatik të akredituar në Tiranë, ish Ministra të Kulturës dhe ish-drejtues të Bibliotekës ndër vite, njerëz të artit dhe kulturës, botues, studiues, lexues etj. Ishte drejtoresha e këtij institucioni, Persida Asllani, e cila u tregua e kujdesshme që gjatë kësaj ceremonie të përshëndeste të gjithë me radhë që nga bashkëpunëtorët, punonjësit, donatorët, lexuesit më të mirë etj. Duke kujtuar një thënie të Ciceronit se “Kush zotëron një kopësht dhe një bibliotekë, zotëron gjithçka”, por që në rastin konkret ishte biblioteka ajo që i dhuronte kujtdo një kopsht të brendshëm, shpirtëror, Asllani kujtoi rrugën që i është dashur të kalojë Bibliotekës Kombëtare, për t’u bërë ajo që është sot, të ofrojë më shumë shërbime e të përqafojë teknologjitë e reja. Pak me tej ajo u shpreh për ëndrrën e saj dhe shumë lexuesve shqiptarë “për një bibliotekë të përtërirë, për një bibliotekë dinjitoze, jo vetëm për mënyrën si funksionon në informacionin dhe pasurinë që i ofron kulturës kombëtare, por dinjitoze edhe në hapësirat e veta, në mjediset e punës dhe në mjediset e leximit; në mjediset e shkëmbimit kulturor, por edhe në mjediset e shkëmbimit profesional dhe formues”.

Pikërisht ky 95-vjetor u bë edhe momenti i bukur për të dhënë shpresa në realizimin e kësaj ëndrre. Ministrja e Kulturës, z. Mirela Kumbaro, në fjalën e saj përshëndetëse ndërsa e përforcoi premtimin saj të kahershëm për zgjerimin e domosdoshëm të hapësirave, shprehu kënaqësinë për atë çka është bërë në Bibliotekën Kombëtare për afrimin e të gjitha moshave drejt librit. ,Ndërsa, për fat të keq, bibliotekat e qyteteve të tjera nuk janë në gjendje të kënaqshme. “Tashmë - vijoi ajo, - përmes reformës në pushtetin lokal, do të vijohet me një tjetër sfidë, siç është ajo e ripërtëritjes së rrjetit Kombëtar të Bibliotekave.”

Fjala e Kryeministrit Rama solli edhe premtimin e shumëpritur në këto 25-vjet për Institucionin e librit: “Ne do të bëjmë për Bibliotekën Kombëtare sa nuk është bërë për 25 vite të marra së bashku. Ne jemi plotësisht të angazhuar në këtë proces dhe do t’ia rikthejmë Bibliotekës Kombëtare pjesën e trupit të saj të amputuar nga barbaria e kulturës së tranzicionit”, tha ai. Projekti për rikthimin e hapësirave të BK-së mbështetet nga Bashkimi Europian dhe kryeministri Rama shprehu gatishmërinë për ta çuar atë deri në fund.

Për ta bërë më të prekshme këtë ngjarje, ashtu si edhe për çdo përvjetor apo aktivitet tjetër, Biblioteka Kombëtare e shoqëroi ceremoninë e 95-vjetorit të themelimit edhe me një ekspozitë të titulluar “Biblioteka e Bibliotekave”. Ajo është konceptuar si një nderim për ato biblioteka private ose kolektive, përmes të cilave është ngjizur pjesa më e vlefshme e fondit të albanologjisë, “duke i lejuar në disa raste këtij institucioni të flasë sot për ekskluzivitete dhe raritete”, siç do të shprehej drejtoresha Persida Asllani. Ndër bibliotekat më të spikatura të kësaj ekspozite vlen të përmendet Biblioteka e Lumo Skendos, Biblioteka e Weigand-it, Biblioteka e Françeskanëve, Biblioteka e Bushatllinjve, Biblioteka Carnavon, Biblioteka e Mitrush Kutelit, Biblioteka e Karl Gurakuqit, Biblioteka e Nexhip Alpan, Biblioteka e Aleks Budës etj.

Ceremonia vijoi edhe me ndarjen e Çmimit Kombëtar të Bibliofilisë “Lumo Skendo”, i cili, që nga viti 2013 i është besuar Bibliotekës Kombëtare. I akorduar për herë të parë në vitin 2006, është çmimi i vetëm që nxit dhe mbështet cilësinë estetike të botimeve shqiptare. Ky çmim i shërben vlerësimit dhe stimulimit të botimeve me vlera të spikatura bibliofilike dhe intelektuale, nëpërmjet evokimit të personalitetit të kulturës dhe politikës shqiptare Lumo Skendo (Mit’hat Frashëri), veçanërisht si themelues i bibliofilisë shqiptare.

Ishte ministrja e Kulturës, Mirela Kumbaro, që u ftua t’i dorëzonte këto çmime. Për vitin 2013, ky çmim iu dha Botimeve “Princ” për botimin e “Triologjia Albanica” (kolanë triptike) nga Arshi Pipa, me motivacionin “si një botim që harmonizon vlera të çmuara intelektuale, estetike e bibliofilike, duke pasuruar me hijeshi e dije Bibliotekën Albanologjike”. Ndërsa për vitin 2014, çmimi i bibliofilisë “Lumo Skendo” iu dorëzua shtëpisë botuese “Albas”, për botimin e vëllimit poetik “Vrima” të autores Rita Petro, me motivacionin “si një botim elegant që harmonizon konceptualen e imazhit dhe artin e poezisë me provokimin estetik, duke pasuruar shijen bibliofilike të leximit”.




















Foto © Blerta KAMBO