Ngjarje

Biblioteka Kombëtare, homazh për akademikun Kristo Frashëri


Në Bibliotekën Kombëtare më datën 1 shkurt u çel ekspozita përkujtimore “Kristo Frashëri (1920-2016)”, si një homazh kushtuar akademikut, historianit, profesorit Kristo Frashëri, i cili u nda nga jeta një ditë më parë. Kjo ekspozitë me veprat dhe studimet e tij vjen për publikun e gjerë dhe lexuesit e Bibliotekës Kombëtare si një vëmendje e veçantë kushtuar kontributit dhe personalitetit të jashtëzakonshëm shkencor të akademikut Kristo Frashërit.

Duke lënë pas një trashëgimi të vyer në fushën e historiografisë, Kristo Frashëri është autor i një sërë monografish, vepra kolektive dhe përmbledhje studimesh ndër tyre “Historia e Çamërisë” (2015); “Principata e Arbërisë: 1190-1215” (2014); “Jeta e një historiani” (2014); “Ahmet Zogu: vështrim historik” (2014); “Etnogjeneza e shqiptarëve - vështrim historik” (2013); “Lidhja Shqiptare e Prizrenit 1878-1881” (2012); “Ismail Qemali – Album” (2012); “Monedha, krediti dhe banka në Shqipëri gjatë shekujve:(vështrim i shkurtër): me një shtojcë dokumentare” (2011); “E vërteta mbi Shqiptarët e Maqedonisë dhe shtrembërimet e Enciklopedisë së Shkupit” (2010); “Historia e Kosovës. Dardania (Kosova Antike)” (2009); “Skënderbeu i shpërfytyruar “ (2009); “Bajroni në Shqipëri dhe takimet me Ali Pashë Tepelenën (Vjeshtë 1809)” (2009); “Historia e qytetërimit shqiptar (Nga kohët e lashta deri në fund të Luftës së Dytë Botërore)” (2008); “Identiteti kombëtar shqiptar” (2006); “Historiografia shqiptare në tranzicion” (Tiranë, 2006); “Skënderbeu në burimet dokumentare shqiptare në shek. XV” (2005); “Himara dhe përkatësia etnike e himarjotëve“ (2005); “Historia e Tiranës” (2004); “Lidhja Shqiptare e Prizrenit 1878–1881” (1997), “Shpallja e Pavarësisë së Shqipërisë: 28 Nëntor 1912” (1957 ), etj. Bashkautor i një sërë botimesh si “Histoire de l’Albanie” (Lion, 1974); “Historia e Shqipërisë”, (1967) si dhe autor i teksteve të historisë së Shqipërisë për shkollat e mesme gjatë viteve 1970–1980, etj.

Kristo Frashëri lindi në Stamboll më 1920. Familja e tij u vendos në Tiranë më 1927. Më 1940, pasi kreu shkollën e mesme, u regjistrua në Fakultetin e Shkencave Ekonomike në Universitetin e Firences. Më 1942 u burgos dhe u internua nga administrata fashiste e pushtimit dhe më 1943 kaloi në radhët partizane. Në vitin 1945–1952 punoi në Bankën e Shtetit Shqiptar. Ndërkohë ndoqi studimet e larta në Fakultetin e Historisë e të Filologjisë, në Institutin e Lartë Pedagogjik (1951–1955). Prej vitit 1953 punonjës shkencor në Institutin e Shkencave, më 1955 në Institutin e Historisë e të Gjuhësisë, më 1957 në Fakultetin e Historisë e të Filologjisë të UT. Më 1966 punoi 5 vjet si mësues në shkollën e mesme të Përmetit, dhe në vitin 1971 u emërua përsëri punonjës shkencor në Institutin e Historisë, ku doli në pension (1990). Më 1997 u emërua zëvendëskryetar i Akademisë së Shkencave të Shqipërisë, deri në vitin 1999 kur doli në pension. Prej më shumë se 70 vjetësh Kristo Frashëri do t’i përkushtohej studimeve dhe hulumtimit shkencor të historisë, e cila përfshin të gjitha periudhat e historisë së Shqipërisë: antikiteti, mesjeta, Rilindja Kombëtare dhe koha e sotme. Ai ka trajtuar tema jo vetëm nga historia politike, por edhe ekonomike, shoqërore e kulturore. Ka marrë pjesë me referate në veprimtari shkencore kombëtare e ndërkombëtare dhe ka botuar artikuj në një varg revistash shkencore, brenda dhe jashtë vendit. Është nderuar dy herë me “Çmimin e Republikës” të kl. I (1961, 1984) si dhe me Urdhrat “Mjeshtër i Madh” dhe “Nderi i Kombit”.

Ekspozita do të qëndrojë e hapur për të gjithë vizitorët, në hollin e Bibliotekës Kombëtare, çdo ditë nga dt. 1 shkurt 2016, nga ora 8:00 – 20.00 dhe gjatë fundjavës nga ora 08:00 – 14.00.