Ngjarje

Biblioteka Kombëtare, kremtime në Vitin Kulturor kushtuar Ismail Kadaresë në 80-vjetorin e lindjes
Tiranë, 12 shkurt 2016


Në Bibliotekën Kombëtare të Shqipërisë, në kuadër të kremtimeve për Vitin Kulturor kushtuar Ismail Kadaresë në 80-vjetorin e lindjes, ditën e Premte, dt.12.02.2016, u zhvilluan një varg aktivitetesh kulturore, si tri qasje të ndryshme, studimore, estetike e informative përmes: konferencës shkencore “Ismail Kadare: leximi dhe interpretimi”, ekspozitës “Qytetet e Kadaresë” dhe promovimeve të disa botimeve shkencore realizuar me rastin e 80-vjetorit të shkrimtarit. Me pjesëmarrjen e Ministres së Kulturës znj. Mirela Kumbaro, Akademik Rexhep Ismajlit, Akademike Floresha Dados, shkrimtarit Bashkim Shehu, Prof. Ardian Ndrecës, Prof. Persida Asllanit, Prof. As. Mark Marku etj., ky aktivitet shenjon edhe fillimin e kremtimeve kushtuar 80-vjetorit të Ismail Kadare në BKSH. Në fjalën e saj, drejtoresha e Bibliotekës Kombëtare, prof. Persida Asllani, duke falenduar të ftuarit dhe pjesëmarrësit, u shpreh se “ky aktivitet, në nderim të shkrimtarit Ismail Kadare, synon të nxjerrë në pah raportin e privilegjuar që ka ndërtuar ai me kulturën shqiptare, e përmes saj edhe me atë botërore, për të rrokur disa nga pamjet më bashkëkohore të këtij rrugëtimi kulturor të pashembullt”. Kjo marrëdhënie specifike, zë fill qysh me botimet e hershme të Kadaresë dhe vijon gjithnjë e më intensive dhe komplekse edhe sot, përmes leximesh, interpretimesh, analizash e sidomos përvojash estetike të rralla që vepra e tij ua dhuron bujarisht lexuesve prej rreth 65-vjet krijimtarie letrare të pandërprerë. Duke prezantuar këtë mozaik aktivitetesh, si ndër më të plotët e Bibliotekës Kombëtare, prof. Asllani theksoi se “mundësitë e reja të leximit dhe interpretimit të veprës kadareane, nga romanet te poezia, nga dialogu te digresioni, nga shkrimi te teksti, nga fiksioni te eseja, nga botimet kritike te leximet subjektive, do të mbetet në thelb një sfidat e përhershme e leximit dhe interpretimit të letërsisë”. Ndërkohë, znj. Mirela Kumbaro, Ministre e Kulturës, në fjalën e saj përshëndetëse “aktivitetet në kuadër të Vitin Kulturor kushtuar Ismail Kadaresë në 80-vjetorin e lindjes, nuk janë thjesht ngjarje kremtuese, por janë një mundësi që të gjithë të jemi bashkudhëtarë jo vetëm të veprës letrare të Ismail Kadare, por edhe bashkudhëtarë të një pjese shumë të rëndësishme të historisë së Shqipërisë, e cila në letërsi shndërrohet në e përjetshme dhe universale”.

Leximi dhe interpretimi ishte thelbi i sfidës së rrokur nga studimet dhe analizat më të fundit, të cilat erdhën për pjesëmarrësit përmes kumtesave të akademik Rexhep Ismaljit, akademike Floresha Dados, shkrimtarit Bashkim Shehu, Prof. Ardian Ndrecës, Prof. Persida Asllanit si dhe Prof.as. Mark Marku, etj., duke rimarrë në shqyrtim mundësitë e reja të leximit dhe interpretimit të veprës kadareane, e cila vazhdon të mbetet ende një burim që zgjon interes për studiuesit. Gjatë konferencës u promovuan edhe studimet më të fundit të realizuara me rastin e 80-vjetorit të Kadaresë. Botimet e promovuara, studimi bibliografik “Kadare në gjuhët e botës”, i prof. dr. Bashkim Kuçuku; “Kadare: Bibliografi II: studime për të (1953–2010)” nga Prof.as. dr. Lili Sula dhe Dr. Jorina Kryeziu si dhe përmbledhja me ese dhe studime “Ismail Kadare: leximi dhe interpretimi”, përgatitur nga prof. Ardian Ndreca vijnë si kontributet më të fundme mbi studimin dhe interpretimin e veprës së Ismail Kadaresë. Një element shumë i veçantë që pasoi konferencën ishte edhe ekspozita “Qytetet e Kadaresë”, e cila synon të ndërtojë përmes titujve, pasazheve, librave por edhe imazhesh simbolike një nga tiparet më interesante të veprës së Kadaresë, “shkrimin e Qytetit”, shndërrimin e tij në një personazh të mirëfilltë letrar. Ky shkrim specifik zhvillohet falë një procesi të përhershëm rikthimi e rishkrimi, kompleksiteti kujtese, ëndërrimi e invokimi, vëzhgimi dhe zbulese. Natyrshëm, ekspozita “Qytetet e Kadaresë” e nis rrugëtimin me një nga pamjet më mbresëlënëse dhe më ndikuese të veprës së Kadaresë, siç është rrugëtimi brilant në Kujtesën e qytetit të tij të lindjes, Gjirokastrës, që pikërisht për këtë bëhet edhe Qytet universal. Më tej ajo vijon me qytetet e tjera që kanë lënë mbresë jo vetëm në jetën e autorit por sidomos në krijimet e tij: Moska, Stambolli, Tirana, Parisi etj. Ato vijnë si qytete jo thjeshtë të përshkruara, por themelore në subjektet e prozës apo në fatet e personazheve të tyre, herë si qytete- kujtesë, herë si qytete-mungesë, herë si qytete-pushteti, herë si qytete-rinie, e herë si qytete-lirie.

Ekspozita do të qëndrojë e hapur për të gjithë vizitorët çdo ditë nga dt. 12 shkurt 2016, nga ora 8:00 – 20.00 dhe gjatë fundjavës nga ora 08:00 – 14.00.