Ngjarje

Seminar mbi psikanalizën lakaniane në BKSH
“Lakani i kyçur në një nyje nga Joyce”
Tiranë, 25 mars 2016


Biblioteka Kombëtare e Shqipërsisë, ditën e premte, më 25 mars, hapi dyert për një nga mendjet më sfidante të shekulit XX, që me analizat dhe parashtrimet e veta emancipoi profesionalisht breza të tërë psikanalistësh e intelektualësh në mbarë botën, Jacques Lacan.

Në bashkëpunim me Rrethin Lakanian Shqiptar, psikanalistja nga Strasburgu, prof. Myriam Mitelman, zhvilloi konferencën e parë në BKSH, titulluar “Lakani i kyçur në një nyje nga Joyce” ku u trajtuan prurjet e Lakanit mbi të Pavetëdishmen e strukturuar si gjuhë deri tek e ashtuquajtura teori e nyjeve boromeane, frymëzuar nga shkrimtari James Joyce.

Leksionet e Lakanit karakterizohen nga një gjurmim i thellë i dëshirës së pavetëdijshme. Ai ka analizuar hollësisht konceptet kryesore të psikanalizës duke tentuar gjatë gjithë jetës të lidhte në një ekuacion konceptin e shënjuesit me atë të trupit (jouissance¬s), prej të cilit do të përftonte një subjekt të pavetëdijshëm tepër singolar. Psikanaliza, si praktikë e veçantë e lidhur ngushtësisht me fjalën dhe dëgjimin, po përpiqet tashmë prej vitesh të takojë mendimin shqiptar duke sfiduar mbetjet e ngërçet e një mendimi dhe një gjuhe të drunjtë post-totalitare.