Ngjarje

Biblioteka Kombëtare e Shqipërisë pjesëmarrëse në Javën e Bibliotekave në Kosovë

Të martën, më 12 prill, nisi edicionin XIV një nga ngjarjet më të rëndësishme të librit në Kosovë, Java e Bibliotekave, organizuar nga Biblioteka Kombëtare e Kosovës “Pjetër Bogdani”, gjatë së cilës promovohen dijet e sfidat mbi bibliotekonominë, por edhe aktivitetet kushtuar librit e kulturës së leximit. E ftuar për të qenë pjesë e kësaj jave këtë vit (e në edicionet në vazhdim) është edhe Biblioteka Kombëtare e Shqipërisë, e përfaqësur nga drejtoresha e Institucionit Prof. Persida Asllani dhe specialistë të sektorëve të ndryshëm.

Kjo pjesëmarrje vjen si shprehje e bashkëpunimit gjithnjë e më të ngushtë të dy bibliotekave kombëtare, bashkëpunim i theksuar edhe në Protokollin e bashkëpunimit mes dy qeverive, përkatësisht në aktivitetet e përbashkëta e reciproke mes dy Ministrive të Kulturës. Pikërisht duke reflektuar këtë protokoll e vullnet bashkëpunues, Biblioteka Kombëtare e Shqipërisë solli për publikun e Prishtinës ekspozitën: “Qytetet e Kadaresë”, aktivitet në kuadër të vitit kulturor kremtues në 80-vjetorin e shkrimtarit, me dëshirën për të ndarë rrugëtimin në veprën kadareane përmes leximit dhe shkrimit të Qytetit, të propozuar edhe më parë për publikun në Tiranë. Gjithashtu, në bashkëpunim mes dy bibliotekave kombëtare - të Shqipërisë dhe të Kosovës, u ndërmor edicioni II i Konferencës së përbashkët shkencore: “Kadare - leximi dhe interpretimi”, në të cilën kanë referuar studiues të të dy vendeve. Specifikë e këtij edicioni për BKSH-në ishte pjesëmarrja me kumtime e studime shkencore mbi veprën e Kadaresë të vetë specialistëve të Bibliotekës, duke dëshmuar vullnetin e Bibliotekës Kombëtare të Shqipërisë për t’u shndërruar edhe në promotore të kërkimit shkencor në vend e rajon. Kumtimet e këtij edicioni synonin gjithashtu të merrnin në shqyrtim mundësitë e reja të leximit dhe interpretimit të veprës kadareane. Nga romanet te poezia, nga dialogu te digresioni, nga shkrimi te teksti, nga fiksioni te eseja, nga botimet kritike te leximet subjektive, tipar i kësaj konference mbeti në thelb sfida e përhershme e leximit dhe interpretimit të letërsisë. Programi i edicionit II vijoi me kumtime të larmishme: Prof. Dr. Persida Asllani (BKSH): Shkrimi i qytetit të përjetshëm; Dr. Osman Gashi (UP): I. Kadare dhe identiteti i letërsisë; Dr. Gazmend Krasniqi (BKSH): Kadare- Perspektiva poetike; Dr. Nerimane Kamberi (UP): Kadare, shkrimtar përtej kufijve; Dr. Vehbi Miftari: Kadare – letërsia preferenciale; Mg Anita Lera (BKSH): Gjeneza e “Gjeneralit të ushtrisë së vdekur” në periodikët e kohës.

Gjithashtu, gjatë ditës së parë të Javës së Bibliotekave në Kosovë, BKSH vijoi prezantimet edhe me promovimet e botimeve të saj profesionale dhe bibliografike: “Bibliografinë e librit shqip 1945-1958” (vëllimi III), përmbyllje e etapës së fundit të Bibliografisë Retrospektive të Librit Shqip si dhe me “Aftësimi në Informacion përmes Teknologjive të Reja dhe Komunikimit” - Aktet e Konferencës së Shkencës së Bibliotekave dhe Informacionit Shqipëri-Kosovë 2014.

Pas kurorëzimit me sukses të dy vëllimeve të para të bibliografive retrospektive të librit shqip të periudhës: 1555-1912 dhe 1913-1944, BKSH njoftoi përfundimin edhe të vëllimit III të Bibliografisë Retrospektive të librit shqip, që i përket periudhës 1945-1958. Kjo bibliografi do t’i bashkangjitet dy bibliografive të para që gjenden tashmë në faqen e Bibliotekës Kombëtare bksh.al, në versionin online. Kështu plotësohet i gjithë informacioni bibliografik mbi botimet libër, që prej librit të parë të dokumentuar “Meshari” i Gjon Buzukut e deri në librat e fundit të botuar që përfshihen në bibliografinë kombëtare korrente. Pas një përmbledhje të kritereve të përshkrimit dhe të hartimit të dy vëllimeve të para të bibliografive retrospektive, u prezantua dhe Vëllimi III, që përmbyll etapën e këtyre bibliografive. Ky vëllim përfshin të gjitha librat, që janë botuar në Republikën e Shqipërisë prej vitit 1945 deri në 1958 dhe ndodhen në fondet e Bibliotekës Kombëtare. Kështu përdoruesi i Bibliotekës Kombëtare, i ndodhur sot kudo në botë, qoftë student, studiues i fushave të rëndësishme të dijes, ka një informacion të plotë mbi librin që ndodhet në fondet e Bibliotekës, por mbi të gjitha një informacion të organizuar dhe të pajisur me elementë të rëndësishme kërkimi. Hartimi i Vëllimit të III të Bibliografisë retrospektive të librit përbën një kontribut, në historinë e bibliografive kombëtare të librit, duke e kompletuar tërësisht pasqyrimin e librave shqip, prej 1555-ës e deri 1958. Kjo punë dhe ky prezantim u zhvillua nga bibliografja e talentuar e BKSH-se zn. Brunilda Tahiri.

Ndërsa “Aftësimi në informacion” është tashmë pjesë integrale e politikave dhe strategjisë së BKSH. Kjo strategji u parapri me organizimin në vitin 2014 e Konferencës së shkencës së bibliotekave dhe informacionit Shqipëri-Kosovë Edicioni IX me temë: “Aftësimi në informacion përmes teknologjive të reja dhe komunikimit” , ku Shqipëria u përfshi në kremtimet e përvjetorit të 40- të përkufizimit të termit “Aftësim në Informacion”, si një nga principet bazë të bibliotekonomisë bashkëkohore në nivel tashmë global. Aktet e botuara të kësaj konference u prezantuan në Kosovë nga specialistja e BKSH-së Renida Ferro, e cila sqaroi gjithashtu se në këtë botim përfshihet e përkthyer në shqip paketa e plotë e dokumenteve (deklarata, manifeste etj.) të IFLA-s dhe UNESCO-s mbi Aftësimin në Informacion. Gjithashtu, u vijua me prezantimin e projektit të BKSH-së mbi strategjinë e “Aftësimit në Informacion”, qëllimi, objektivat, mjetet me të cilat realizohet ajo si dhe modulet teorike e praktike. Interes pati funksionimi dhe zbatimi i strategjisë për grupmosha të ndryshme dhe zbatimi i saj për kategori të ndryshëm përdoruesish. Të pranishmit u njohën edhe me aktivitetet, veprimtaritë, seminaret, vizitat e grupmoshave të ndryshme dhe leksionet e hapura mbi “Aftësimin në Informacion” që zhvillohen prej më se një viti në mjediset e BKSH-së.

Në ceremoninë e hapjes së “Javës së Bibliotekës” mori pjesë ministri i Kulturës, Rinisë dhe Sportit, Prof. Kujtim Shala, përfaqësues nga Ambasada e Amerikës, ambasadori i Republikës së Shqipërisë në Kosovë - z. Qemal Minxhozi, Rektor i Universitetit të Prishtinës - z. Marjan Dema, lektorja e ftuar nga Biblioteka Publike e Nju Jorkut Dr. Alexandra Kelly, profesorë, shkrimtarë, botues, përfaqësues të kulturës e të politikës dhe lexues. Tematika specifike e kësaj jave, e përzgjedhur nga BKK në bashkëpunim me Ambasadën Amerikane në Kosovë ishte një nga sfidat e bukura të bibliotekonomisë bashkëkohore: “Dokumentimi i realitetit historik të Kosovës”.

Në hapje zyrtare të kësaj veprimtarie, Drejtori i BKK “Pjetër Bogdani”, z. Fazli Gajraku u shpreh se “edicioni i sivjetmë me gjithë aktivitetet dhe veprimtaritë, synon të kryejë funksionin e një ndërgjegjësimi publik për të promovuar kulturën bibliotekare, për të nxitur përdorimin e bibliotekës, por edhe përkrahjen e tyre”. Ai vlerësoi se Java është dhe duhet të jetë javë e një respekti kombëtar për bibliotekat dhe bibliotekarët, të përkushtimit ndaj tyre, të cilët e mirëmbajnë kujtesën për kulturën dhe dijen njerëzore. Znj. Persida Asllani, drejtoreshë e Bibliotekës Kombëtare të Shqipërisë, në fjalën e saj përshëndetëse theksoi rëndësinë e bashkëpunimit e shkëmbimit institucional mes dy bibliotekave si dhe siguroi mbështetje sistematike për thellimin e tij.