Ngjarje

Prezantohet juria shqiptare e Çmimit Strega 2016 në BKSH
Tiranë, 22 Prill 2016


Me rastin e 23 Prillit, Ditës Ndërkombëtare të Librit dhe të së Drejtës së Autorit, Biblioteka Kombëtare e Shqipërisë, në bashkëpunim të ngushtë me institucione të rëndësishme kulturore, do të zhvillojë një sërë aktivitetesh, si një javë e veçantë për të gjithë dashamirësit e librit. Duke e çelur siparin e saj sot, më datë 22 Prill, Biblioteka Kombëtare, në bashkëpunim me Institutin Italian të Kulturës, dhe me pjesëmarrjen e Ministres së Kulturës, Mirela Kumbaro, prezantoi jurinë e Çmimit prestigjioz letrar Strega 2016. Në këtë aktivitet morën pjesë edhe përkthyes, studiues, botues, lexues dhe dashamirës së librit dhe kulturës italiane.

Gjatë fjalës së saj prof. Persida Asllani, drejtore e Bibliotekës Kombëtare duke çelur Javën e veprimtarive që do të zhvillohen në kuadër të 23 Prillit, edhe me surpriza të këndshme për lexuesit, u shpreh përmes një citimi të Claudio Magris se “janë libri dhe leximi ata që garantojnë më mirë liritë e një demokracie”. Çmimi Strega, vjen në vazhdën e bashkëpunimit të ngushtë të BKSH-së me Institutin Italian të Kulturës dhe do të thellojë edhe më shumë lidhjen e ngushtë midis shqiptarëve dhe kulturës italiane.

Ndërkohë Mirela Kumbaro, ministre e Kulturës, duke folur për rëndësinë e pjesëmarrjes së një jurie shqiptare në dhënien e një çmimi prestigjioz letrar italian Strega, u shpreh se “tani më jemi përballë një realiteti ndërkulturor, të një komunikimi tashmë historik por edhe të intensifikuar midis dy vendeve. Në këtë bashkëpunim të ngushtë midis institucioneve sollëm për herë të parë në Tiranë çmimin Strega, jo vetëm si një ngjarje veçantë kulturore, një zë brenda vlerësimit të një çmimi prestigjioz, ku autorë të mëdhenj italianë kanë qenë fitues të tij, si Umberto Eko, etj.”. Duke vijuar me prezantimin e programeve dhe projekteve të rëndësishme të inicuara nga Ministria e Kulturës për promovimin e kulturës shqiptare znj. Kumbaro theksoi “rëndësinë e këtyre iniciativave me vlerë për kulturën e leximit, ku përfituesi kryesor i saj është lexuesi”. Po kaq i rëndësishëm vjen ky bashkëpunim me BKSH-së edhe për znj. Adriana Frisenna, drejtore e Institutit Italian të Kulturës, e cila duke prezantuar jurinë që do të vlerësojë librat, si dhe autorët dhe veprat e tyre, të cilat do të konkurojnë për çmimin Strega 2016, vuri në dukje se “nga ky vit Shqipëria do të bëhet pjesë e jurisë për Çmimin Strega me grupin e saj të Leximit, koordinuar nga Instituti Italian i Kulturës në Tiranë. Për herë të parë lexuesve shqiptarë, të përbërë nga një mix përkthyesish, botuesish, italianistësh dhe dashamirës së kulturës italiane, do t’u kërkohet të gjykojnë romane italiane”.

Çmimi Strega, çmimi letrar më prestigjioz italian, u themelua në vitin 1947 në Romë nga Maria dhe Goffredo Bellonci, me kontributin e Guido Alberti, pronar i fabrikës së pijeve Strega Alberti Benevento, prodhues i likerit me të njëjtin emër. Çmimi i jepet çdo vit një romani, shkruar në gjuhën italiane dhe botuar gjatë edicionit të pare, mes datës 1 prill të vitit të kaluar dhe datës 31 mars të këtij viti. Votuesit e Çmimit Strega janë Miqtë e së dielës, një grup burrash dhe grash eksponentë të botës kulturore. Votimi zhvillohet në dy faza. Sondazhi i votimit të parë, për përcaktimin e pesë finalistëve, do të mbahet më 15 qershor. Votimi i dytë dhe shpallja e fituesit do të mbahet më 8 korrik. Përveç Miqve të së dielës, grup elektoral historik i përbërë nga rreth 400 persona, marrin pjesë në këtë juri edhe 60 lexues të fortë, të zgjedhur nga librashitësit në mesin e klientëve të tyre, të cilët ndryshohen çdo vit si dhe pesëmbëdhjetë grupe lexim nga shkollat, universitetet dhe Institutet Italiane të Kulturës jashtë vendit. Fitimi i Çmimit Strega përbën prestigj të madh për veprën dhe natyrisht për autorin. Disa nga shkrimtarët që kanë fituar çmimin Strega, shumë të njohur edhe për lexuesin shqiptar janë Cesare Pavese (1950), Alberto Moravia (1952), Giorgio Bassani (1956), Dino Buzzati (1958), Giuseppe Tomasi di Lampedusa (1959), Umberto Eco (1980), Dacia Maraini (1999), etj.