Ngjarje

BKSH, pjesëmarrëse në nismën “Dhuro një libër, dhuro jetë”
1 Qershor


Një nga nismat më të reja dhe më të bukura “Dhuro një libër, dhuro jetë”, e ndërmarrë nga Biblioteka Komunitare e Bathores me mbështjetjen e Bibliotekës Kombëtare të Shqipërisë si dhe “Shqipëria Mision i Mundshëm” dhe World Vision, u përmbyll me sukses ditën e mërkurë, më datë 1 Qershor, në Ditën Ndërkombëtare të Fëmijëve. Fushata ndërgjegjesuese për dhurimin e librave “Qasju librit” do t’i vijë në ndihmë pasurimit të fondit të bibliotekës së shkollës 9-vjeçare në Bathore, “Halit Coka”, si një nevojë e madhe për dije dhe dëshirë për të afruar nxënësit e shkollave dhe komunitetin me librin. Kjo nismë, e prezantuar pak ditë më parë nga BSKH, kulmoi me dhurimin e librave në një ditë të rëndësishme dhe të bukur për fëmijët, 1 Qershorin, Ditën Ndërkombëtare të Fëmijëve.

Në fjalën e saj përshëndetëse Prof. Dr. Persida Asllani, drejtore e Bibliotekës Kombëtare, u shpreh se “kjo nismë e bukur vjen me një ftesë shumë domethënëse “Dhuro një libër, ndrysho jetë” dhe ky ndryshim është edhe më i rëndësishëm kur nis me fëmijët, përmes edukimit me librin, rritjes së dëshirës për lexim dhe dije”. Duke theksuar rëndësinë e këtyre aktiviteteve promovuese për vlerat e librit dhe të bibliotekave, drejtoresha e BKSH-së, znj. Asllani nënvizoi se “Biliotekat janë hapësirat më të mira të shkëmbimit të librave, në të cilat gjen një informacion të pafundëm dhe të sigurtë. Ngritja e një biblioteke komunitare, si Biblioteka Komunitare e Bathores, është një kontribut i jashtëzakonshëm dhe shumë i bukur i ngritur nga vetë komuniteti. Nisma të tilla, që ndihmojnë fëmijët për të ndryshuar të ardhmen e tyre, duhen përkrahur dhe mbështetur”.

Ndërkohë, Besa Shapllo, drejtore e “Mission Possible Albania”, duke falenderuar Bibliotekën Kombëtare për përkrahjen e saj theksoi “rëndësinë e madhe të pasurimit të bibliotekave të shkollave në Bathore, si një dritare e re drejt dijes që u hapet fëmijëve të kësaj zone. Nisma “Qasju librit” është një projekt shumë i rëndësishëm për të gjithë fëmijët e zonës së Bathores. Biblioteka Komunitare e Bathores është hapur në vitin 2011 dhe ka 1 000 anëtarë, nxënës të shkollave 9-vjeçare dhe të shkollave të mesme, kjo tregon edhe dëshirën për të lexuar të nxënësve të shkollave të Bathores dhe vetë komunitetit, por njëherazi edhe nevojën e madhe për të pasuruar bibliotekat e shkollave me libra, të cilat do të plotësojnë nevojat e tyre”. Kjo nismë u mbështet me dhurime nga botues, studiues, punonjës të Bibliotekës Kombëtare si dhe nga Ministria e Kulturës. Antarët e Klubit të Librit “Rrok@Fjala” të Bibliotekës Komunitare të Bathores mirëpritën dhuruesit gjatë gjithë ditës së djeshme në tendat e vendosura pranë Bibliotekës Kombëtare. Fondi i mbledhur nga dhurimet arriti në 250 libra, të cilat përfshinin botime për mosha të ndryshme, në gjuhë shqipe por edhe të huaj. Në përfundim të aktivitetit librat e dhuruar u transportuan me biçikleta drejt bibliotekës së shkollës 9-vjeçare “Halit Coka”, për të promovuar njëherazi edhe kujdesin për natyrën.