Ngjarje

Biblioteka Kombëtare: Konferenca shkencore dhe ekspozita “Kujtesa e Rugovës”
15 Qershor 2016


Biblioteka Kombëtare e Shqipërisë dhe Biblioteka Kombëtare e Kosovës, në 10-vjetorin e ndarjes nga jeta të Ibrahim Rugovës, zhvilluan të mërkurën, 15 Qershor, Konferencën Shkencore dhe Ekspozitën “Kujtesa e Rugovës”, me pjesëmarrjen e Ministrave të Kulturës znj. Mirela Kumbaro dhe z. Kujtim Shala. Një bashkëpunim real mes dy Bibliotekave, por edhe studiuesish nga Shqipëria dhe Kosova, kjo konferencë synon rrokjen e shumëanshme të figurës së Ibrahim Rugovës si krijues, intelektual dhe një personalitet i papërsëritshëm politik mbarëkombëtar. Duke kujtuar At Zef Pllumit, i cili e cilësonte Rugovën ‘si një ndër burrat e rrallë të kombit shqiptar, ndoshta ma i rralli ndër shekujt e fundit’, Prof. Dr. Persida Asllani, drejtore e Bibliotekës Kombëtare të Shqipërisë, u shpreh se “përkujtimi i 10-vjetorit të ndarjes nga jeta të një nga personaliteteve më të rëndësishëme të kulturës dhe kombit shqiptar, Ibrahim Rugovës, i cili i është besuar dy bibliotekave, sot ndalet në Bibliotekën Kombëtare të Shqipërisë”. Më tej znj. Asllani theksoi se “përmes kësaj konference shkencore dhe ekspozite, e cila realizon prerjet dhe leximet e shumfishta të këtij personaliteti poliedrik, Ibrahim Rugova na kthehet si një moment kujtese, një kujtesë e bukur që sa vjen e bëhet më e qartë, jo me mungesën e saj por edhe me rrezatimin dhe ndikimin që reflekton ndër ne”.

Drejtori i Bibliotekës Kombëtare të Kosovës, “Pjetër Bogdani”, Fazli Gajraku, në fjalën e tij përshëndetëse theksoi se, “kjo konference shkencore dhe ekspozitë është ajo kujtesa e madhe emocionale që e bën Ibrahim Rugovën të pranishëm ndër ne. Rugova vjen në dy kahje, me portretin e tij njerëzor përmes fotografive dhe mendimeve dhe pikëpamjevev të tij që vijnë përmes veprave të tij”. Ndërkohë znj. Mirela Kumbaro, Ministre e Kulturës, duke shprehur rëndësinë dhe vendin e veçantë që zë Ibrahim Rugova në kulturën dhe kombin shqiptar, nënvizoi se “kjo veprimtari është një urë komunikimi e rëndësishme e vendosur midis dy institucioneve kombëtare. Duke respektuar e kujtuar veprën e një mendimtari të shquar si Rugova, respektojmë modelin e dyfishtë të dijetarit dhe të politikanit, dy aspekte që qëndrojnë dhe bashkëveprojnë në mënyrë harmonike” duke vijuar më tej se “Rugova është ndër personaliteet e rrallë që arrijnë të përmbushin misionin e tyre, atë me veten si meditant dhe me vendin si militant, duke kujtuar Sabri Hamitin, se Rugova ishte njeriu me shprehjen e butë dhe qëndrimin e fortë”. Si studiues i veprës dhe figurës së Ibrahim Rugovës, por njëherazi edhe politikan, prof. dr. Kujtim Shala, Ministër i Kulturës së Kosovës, në ligjëtarën e tij nënvizoi rëndësinë e zbulesës dhe kujtesës së dijes së figurës së Rugovës, “të kujtojmë veprën e tij monumentale duke zbuluar. Një zbulesë e parë në dy dimensionet e tij, në atë të një dijetari, kritikut e studiuesit, por edhe të politikanit të rrallë e unik të kombit shqiptar”.

Qasja në këndvështrime të ndryshme të një nga personaliteteve më komplekse të kulturës dhe kombit shqiptar si krijues, intelektual, kritik, politikan i papërsëritshëm, Ibrahim Rugova do të përshfaqej në këtë konferencë me gjithë dimensionin e tij përmes referimeve shkencore të Prof. Dr. Dhurata Shehri, Prof. As. Dr. Nysret Krasniqi, Prof. Assoc. Dr. Mark Marku, Prof. Dr. Persida Asllani, Dr. Muhamet Hamiti, Dr. Agron Gjekmarkaj dhe publicistit Halil Matoshi. Studiues shqiptarë dhe nga Kosova rrokën tema të tilla cilat e sollën të shumëanshëm Rugovën kritik, politikanin me pushtetin mbi veten, qytetarin e edukuar në frymën e demokracisë liberale, themeluesin e shtetit modern të Kosovës, etj.. Konferenca shkencore u pasua me çeljen e ekspozitës së librit dhe asaj fotografike. Biblioteka Kombëtare e Kosovës “Pjetër Bogdani” solli për publikun në Tiranë ekspozitën me botime të Rugovës dhe për Rugovën, që janë pjesë e fondit të kësaj biblioteke. Në të ekspozohen botimet e heshme, gjurmët e para si dhe me libra studimorë, teorikë, kritikë, eseistikë, biografikë, punime dhe ese, të shkruara nëpër revista e gazeta, si një përzgjedhje, në përpjekjen që të jepet sa më e plotë tabloja për jetën dhe veprën e Ibrahim Rugovës, një pikënisje që përkon me marrjen dhe dhënien e asaj çfarë krijohet dhe çfarë ruhet nga trashëgimia e shtypur e kujtesës për Rugovën. Në kujtim të Rugovës, krahas ekspozimit të librave, për vizitorët u prezantua edhe ekspozita e fotografive dokumentare për Rugovën, nga fotografi Fahredin Spahia. Sipas autorit të saj, “fotografitë, nuk janë bërë me idenë për t’i ekspozuar, por kanë qenë një lloj reagimi ndaj këtij personaliteti të jashtëzakonshëm, ikonë edhe intelektuale edhe politike e shqiptarëve”.

Koleksioni fotografik i Fahredin Spahias iu dhurua Bibliotekës Kombëtare të Shqipërisë, dhurim i mundësuar nga Ministria e Kulturës së Kosovës. Ekspozita “Kujtesa e Rugovës” në mbyllje të saj do të digjitohet dhe do të shndërrohet në një ekzpozitë virtuale, e cila do të mund të ‘vizitohet’ online në faqen zyrtare të BKSH-së.

Ekspozita “Kujtesa e Rugovës” do të qëndrojë e hapur për të gjithë vizitorët çdo ditë nga dt. 15 qershor 2016, nga ora 8:00 – 20.00 dhe gjatë fundjavës nga ora 08:00 – 14.00.