Ngjarje

BKSH, ekspozitë në 80-vjetorin e lindjes së akademikut Rexhep Qosja
25 Qershor 2016


Biblioteka Kombëtare e Shqipërisë çeli ditën e shtunë më datë 25 Qershor, me rastin e 80-vjetorit të lindjes së akademikut kosovar Rexhep Qosja, një ekspozitë me veprat dhe studimet e tij, si një vëmendje e veçantë kushtuar kontributit dhe veprimtarisë së tij shkencore e kulturore. Kjo ekspozitë përmbledh punën gati gjysmëshekullore të akademikut Rexhep Qosja, me një vepër të shumanshme në fushën e historisë së letërsisë, kritikës letrare, eseistikës, publicistikës, etj.

Akademik Rexhep Qosja është autor i mbi tridhjetë librave me studime shkencore për letërsinë dhe kritikën letrare, prozë artistike, tregime, romane dhe drama, publicistikë si dhe shkrime polemike. Ka botuar shumë recensione, vështrime, artikuj, sprova, trajtesa e studime në revista shkencore e letrare, në të cilat janë trajtuar çështje të veçanta të letërsisë shqipe dhe të krijimtarisë letrare në përgjithësi. Për publikun e gjerë dhe lexuesit e Bibliotekës Kombëtare, nga fondi i saj, është përzgjedhur vetëm një pjesë e veprës së tij, si intelektual, mendimtar, pedagog dhe personalitet shkencor. Ndër veprat më të rëndësishme, të cilat vazhdojnë të mbeten shtylla të fuqishme dhe me ndikim në kulturën kombëtare, përmendim“Episode letrare” (1967), “Dialogje me shkrimtarët” (1968) “Kritika letrare” (1969), “Antologjia e lirikës shqipe” (1970), “Kontinuitete” (1972), “Asdreni – jeta dhe vepra e tij” (1972), “Panteoni i rralluar” (1973), “Vdekja më vjen prej syve të tillë” (1974), “Shkrimtarët dhe periudha” (1975), “Anatomia e kulturës” (1976), “Mite të zhveshura” (1978), “Prej tipologjisë deri te periodizimi” (1979), “Nocione të reja albanologjike, (1983), “Historia e letërsisë shqipe – Romantizmi I-II-III” (1984-1985), “Porosia e madhe” (1986), “Fjalori demokratik” (1997), “Çështja shqiptare, Historia dhe politika” (1998), “Strategjia e bashkimit kombëtar” (1998), “Një dashuri dhe shtatë faje” (2001), “Ideologjia e shpërbërjes, trajtesë mbi idetë çintegruese në shoqërinë e sotme shqiptare” (2006), “Shqipëria dhe Kosova - Si janë dhe si do të duhej të jenë” (2013) si dhe ditari në dy vëllime i botuar në vitin 2014 “Dëshmitar në kohë historike 1966-1974 - Ditar I” dhe “Dëshmitar në kohë historike 1975-1978 - Ditar II”. Krahas tyre qëndrojnë edhe një numër i madh artikujsh të botuar në periodikë të kohës, në Kosovë dhe në Shqipëri. Disa punime dhe vepra të tij janë përkthyer në gjuhë të tjera si serbisht, bullgarisht, gjermanisht si dhe frëngjisht. Në vitin 2010 Instituti Albanologjik i Prishtinës botoi kompletin e veprave në 29 vëllime, i cili vjen në pesë cikle dhe përmban veprën e plotë studimore dhe letrare të akademikut Qosja.

Rexhep Qosja u diplomua më 1964 në degën e Gjuhës dhe të Letërsisë Shqipe të Fakultetit Filozofik të Prishtinës dhe në vitin 1967 pranohet asistent në Institutin Albanologjik të Prishtinës. Në vitin 1971 mbrojti tezën e doktoratës mbi jetën dhe krijimtarinë e Asdrenit dhe prej vitit 1972 deri më 1981 drejton Institutin Albanologjik në Prishtinë. Për krijimtarinë shkencore e letrare është vlerësuar me një sërë çmimesh, mes tyre në vitin 2000 Rexhep Mejdani, Presidenti i Republikës së Shqipërisë i dha çmimin “Nderi i Kombit”.

Ekspozita do të qëndrojë e hapur për të gjithë vizitorët, në hollin e Bibliotekës Kombëtare, çdo ditë nga dt. 25 qershor 2016, nga ora 8:00 – 20.00 dhe gjatë fundjavës nga ora 08:00 – 14.00.