Ngjarje

Biblioteka Kombëtare çel kremtimet në kuadër të 85-vjetorit të Dritëro Agollit
10 Tetor 2016


Biblioteka Kombëtare e Shqipërisë, në 85-vjetorin e lindjes së personalitetit të letrave shqipe, Dritëro Agolli, zhvilloi ditën e hënë, 10 tetor, veprimtarinë kremtuese “Ekspozita agolliane dhe ligjërata”, me pjesëmarrjen e Ministres së Kulturës, Mirela Kumbaro-Furxhi, akademikë, studiues dhe profesorë, familjarë të shkrimtarit, dashamirës të kulturës si dhe lexues të Bibliotekës Kombëtare. Ky aktivitet kulturor shënon fillimin e kremtimeve, në kuadër të 85-vjetorit të lindjes së shkrimtarit, të cilat nisën sot në BKSH për të vijuar më tej gjatë kësaj jave në institucione të rëndësishme kulturore në vend.

Në fjalën e saj përshëndetëse, drejtoresha e Bibliotekës Kombëtare, Persida Asllani, u shpreh se “ekspozita agolliane sjell një retrospektivë të shkrimtarisë së tij, qysh me zanafillat e hershme poetike më 1948, për t’u zhvilluar e zgjeruar në zhanre e gjini të ndryshme për mbi 65 vjet krijimtari, duke përshfaqur një personalitet herë poliedrik e herë kontradiktor, duke qenë i lexueshëm dhe i referueshëm në dy epoka të ndryshme me njëra-tjetrën”.

Ndërkohë, znj. Mirela Kumbaro-Furxhi, Ministre e Kulturës, duke e cilësuar shkrimtarin Dritëro Agollin “një ikonë të gjallë” theksoi se “rrallë ndeshim një figurë të letërsisë, një shkrimtar që në të gjitha dimensionet e tij krijon një unitet kombëtar, unitet estetik, një unitet njerëzor, madje edhe një unitet politik. Një shkrimtar i dashur për të gjitha brezat, dialektet, në të gjitha trojet por edhe për të gjithë diasporën, duke qenë simbol i një uniteti shpirtëror”.

Në këtë ekspozitë u prezantuan nga poezitë e para të vëllimet poetike, nga skicat te romanet epike, nga fabulat te satira, nga reportazhi te publicistika. Ekspozita dëshmon larminë tipike të krijimtarisë së Dritëro Agollit dhe përfshin edhe një vështrim brenda zhanreve si psh: nga poezitë e para të botuara te “Letrari i ri” dhe “Rinia” më 1948, vijohet me vëllimet e para “Në rrugë dolla” (1958) dhe “Hapat e mia në asfalt” (1961) për të mbërritur te “Pelegrini i vonuar” (1993), “Lypësi i kohës” (1995), “Vjen njeriu i çuditshëm” (1996), “Fletorka e mesnatës” (1998), “Lutjet e kambanës” (1998), etj; nga tregimet e hershme si ato të botuara te “Zëri i Rinisë” më 1955 te përmbledhjet me tregime si “Zhurma e erëreve të dikurshme” (1984) dhe “Njerëz të krisur” (1995) deri te romanet e mirënjohura “Komisari Memo” (1970), “Shkëlqimi dhe rënia e shokut Zylo” (1973), “Njeriu me top” (1975), “Arka e djallit” (1997). Ekspozita gjithashtu sjell në vëmendjen edhe shqipërimet e tij të njohura të Eduard Bagrickit më 1961, “Duart e lira” të Pol Elyar (1984), “Kënga e gëzimeve dhe brengave” të Robert Bërns në vitin 1987, por edhe cikle poetike të Janis Ricos, Aleksandër Bllok, Ana Ahmatova, etj. Gjithashtu në ketë ekspozitë janë përfshirë edhe objekte personale dhe dorëshkrime të shkrimtarit, të cilat i mundësoi familja e shkrimtarit.

Aktiviteti vijoi më pas me ligjëratën “Migjeni i Dritëro Agollit” të Prof. Dr. Shaban Sinani, i cili u ndal në punimin e diplomës së Agollit me titullin “Skicat dhe tregimet e poetit revolucionar shqiptar Migjeni”, mbrojtur para jurisë në Universitetin e Petersburgut në vitin 1957. Gjatë ligjërimit të tij prof. Sinanit nënvizoi se “ndryshe prej studimeve të mëvonshme, Dritëro Agolli nuk e sheh Migjenin si pararendës të realizmit socialist. Migjeni i Dritëro Agollit është më pranë së vërtetës shkencore se Migjeni i traditës së mëvonshme të studimeve letrare shqiptare”. Zgjedhja e Migjenit, përveçse parapëlqim i Dritëro Agollit, lidhej përkthimin në rusisht të “Vargjeve të lira” dhe “Novelave të Qytetit të Veriut” si dhe interesin e vijueshëm për Migjenin dhe dorëshkrimet e tij nga shkencat sovjektie. Por një arsye e tretë mund të kishte lidhje me fushën e diplomimit (gazetari) dhe me nënllojin e zgjedhur (skicat, publicistika).

Në këtë aktivitet nuk mund të mungonte edhe leximi i cikleve poetike të shkrimtarit Dritëro Agolli, si pjesë e nismës shumë të rëndësishme të ndërmarrë nga Ministria e Kulturës, Fushatës Kombëtare të Leximit “Takohemi për një libër”.

Ekspozita do të qëndrojë e hapur për të gjithë vizitorët çdo ditë nga ora 8:00 – 20.00 dhe gjatë fundjavës nga ora 08:00 – 14.00.