Ngjarje

Vizitë e Ambasadores së Kinës në Bibliotekën Kombëtare


Bibliotekën Kombëtare e vizitoi këto ditë Ambasadorja e Republikës Popullore të Kinës, zonja Jiang Yu. Ajo u prit nga drejtoresha e BKSH, zonja Persida Asllani dhe një grup specialistësh. Në kuadër të kësaj vizite, nga Ambasada e Kinës u dhuruan edhe libra mbi Kinën dhe botën kulturore kineze, që prekin fushat të ndryshme si ato politike, historike, kulturore, filozofike, artistike etj., me qëllimin që t'u prezantohet lexuesve shqiptarë panorama e zhvillimit aktual kinez dhe kulturës e vendit.

"Bashkëpunimi në fushën e botimeve është një pjesë e rëndësishme përbërëse e shkëmbimeve kulturore e njerëzore – theksoi ambasadorja Jiang. Tani – vijoi ajo-, projekti i përkthimit dhe i botimeve të veprave klasike midis Kinës e Shqipërisë po ecë mbarë dhe do të shërbejë si një urë e re për shërbimet dhe thellimin e njohjes dhe komunikimit midis dy popujve tanë."

Ambasada e Kinës në Tiranë, shprehu bindjen për të punuar në drejtim të nxitjes së bashkëpunimit të mëtejshëm midis bibliotekave, duke luajtur një rol aktiv për popujt që të njohin reciprokisht kulturat e njëri-tjetrit.

Drejtorja Persida Asllani e falënderoi ambasadën kineze për dhurimin e librave dhe e njohu ambasadoren me koleksionet dhe procesin e digjitalizimit të bibliotekës. Ajo shprehu edhe dëshirën për zhvillimin e shkëmbimeve me Bibliotekën Kombëtare të Kinës.

Ambasadorja e Kinës, zonja Jiang Yu, në përfundim të këtij takimi, vizitoi ekspozitën kushtuar shkrimtarit Dritëro Agolli, çelur në Bibliotekën Kombëtare të Shqipërisë me rastin e 85-vjetorit të lindjes së tij, ku ndër të tjera është ekspozuar edhe botimi më i fundit në gjuhën kineze të romanit “Shkëlqimi dhe rënia e shokut Zulo”.