Ngjarje

Biblioteka vetjake e akademikut Aleks Buda i dhurohet Bibliotekës Kombëtare

 

 

Me rastin e dhurimit të bibliotekës vetjake të akademikut Aleks Buda Bibliotekës Kombëtare, Ministri i Turizmit, Kulturës, Rinisë dhe Sporteve z. Ylli Pango priti më 10.09.2008 përfaqësuesen e familjes Buda znj. Tatjana Haxhimihali (Buda) dhe drejtuesit e Bibliotekës Kombëtare.

 

 

Drejtori i Bibliotekës Kombëtare Dr. Aurel Plasari i dorëzoi familjes së Prof. Aleks Buda Falenderimin e mëposhtëm:

 

Me vlerësime të larta për aktin e dhurimit

të bibliotekës vetjake të personalitetit të shquar të kulturës shqiptare,

si gjest intelektual në shërbim të studiuesve shqiptarë e të huaj

dhe kontribut fisnik në pasurimin e koleksioneve

të Bibliotekës Kombëtare.

Biblioteka e dhuruar përmban botime nga fusha të ndryshme të dijes, që kanë ndikuar edhe në formimin e akademikut Buda, njërit ndër albanologët më në zë të shek. XX. Krahas botimeve – libra apo periodikë – me karakter filozofik, historik, gjuhësor, etimologjik etj., fushë me interes për personalitetin e këtij shkencëtari mbetet edhe letërsia artistike, e cila ndodhet e pranishme edhe në bibliotekën e dhuruar.

Në bazë të një Marrëveshjeje Dhurimi të nënshkruar ndërmjet z. Aurel Plasari, si drejtor i Bibliotekës Kombëtare, dhe trashëgimtarëve të akademikut Aleks Buda, materialet e dhuruara, të cilat janë ende në proces përpunimi bibliotekar, së shpejti do të jenë në dispozicion të studiuesve.

Akti i dhurimit, rreth 9.000 vëllime, mbetet një gjest fisnik që kontribuon në pasurimin e fondit albano - balkanologjik të Bibliotekës Kombëtare.