Ngjarje

BKSH : promovohet vepra studimore “Faik Konica-dritëhijet e një diplomati”

16 dhjetor 2016




Në Bibliotekën Kombëtare të Shqipërisë, në kuadër të përmbylljes së vitit kulturor “Faik Konica”, u promovua ditën e Premte, më datë16 dhjetor, vepra studimore “Faik Konica – dritëhijet e një diplomati” të autorit Agron Alibali, me pjesëmarrjen e veçantë të Prof. Aleks Luarasi, Prof. Pëllumb Xhufit, ish-Presidentit të Shqipërisë, Alfred Moisiu, si dhe studiues të shquar nga vendi dhe Kosova. Në fjalën e saj përshëndetëse, Drejtoresha e BKSH-së, Prof. Dr. Persida Asllani u shpreh se “kjo vepër studimore risjell në vëmendje një prej figurave më të shquara të kulturës dhe diplomacisë shqiptare, Faik Konica, duke na vërtetuar se puna dhe leximi i kontributit e personalitetit të Konicës është ende në proces dhe jo i përmbyllur një herë e përgjithmonë.”

Studimi “Faik Konica - dritëhijet e një diplomati” i Agron Alibalit i mbështetur në dokumente të panjohura, shumica të shfrytëzuara për herë të parë, përfshirë arkivin e Legatës Shqiptare në SHBA, trajton gjerësisht rolin e Vatrës si "qeveri në mërgim", marrëdhëniet komplekse midis dy "shokëve të armëve", Konicës e Nolit; raportet e Konicës me koloninë shqiptare në Sh.B.A etj., ku dalin në pah sidomos edhe "dritëhijet" e tij. Në libër shfaqet figura e Konicës si përfaqësuesi informal diplomatik i Kosovës në Sh.B.A, roli i tij thelbësor për shqipen juridike e diplomatike etj. Rëndësi të veçantë në libër paraqet botëkuptimi shtetformues e kushtetues i Faik Konicës, çka paraqet vlera të posaçme aktuale. Veprimtaria e Konicës përcillet krahas etapave të themelimit e forcimit të shtetit shqiptar, deri në momentet tragjike të pushtimit fashist. Në këtë drejtim, libri rreket të japë kontribut të veçantë në studimet për historinë e shtetit dhe së drejtës në Shqipëri, dhe të rikthejë vëmendjen sidomos në periudhën kritike kur shteti shqiptar u konsolidua nën Mbretin Zog. Në pjesë e tij të fundit trajtohet edhe çështja e bibliotekës së tij të famshme, deri vonë të konsideruar të humbur, si dhe punën për gjurmimin dhe kthimin e kësaj pasurie të çmuar pranë Bibliotekës Kombëtare e Shqipërisë, sikurse e pat lënë amanet vetë Konica. Pak kohë më parë rreth 270 libra të kësaj biblioteke janë bërë pjesë e fondit të vlerave të rralla të Bibliotekës Kombëtare të Shqipërisë, një pjesë e të cilave u ekspozuan për pjesëmarrësit e këtij aktiviteti.

Duke u ndalur në figurën dhe veprimtarinë e Faik Konicës, si një ‘refleksion’ mbi studimin më të fundit për të, prof. Pëllumb Xhufi vuri në dukje se “ky libër ridimensionon figurën e Faik Konicës, si ndër të paktët veprimtarë të Rilindjes Kombëtare që u angazhuan në administratën shqiptare. Kjo vepër mbështetet në dokumentacione të dorës së parë - theksoi ai -, të konsideruara të humbura deri më sot, ku Faik Konica shfaqet si një diplomat klasi, falë kulturës dhe oratorisë së tij të jashtëzakonshme”. Nga ana tjetër, prof. Xhufi tërhoqi vëmendjen e dëgjuesve mbi “aspektet kontradiktore” të “diplomatit Faik Konica” karshi Shtetit shqiptar por edhe federatës “Vatra” në SH.B.A., ku krahas kontributit të tij të pamohueshëm dokumentohen edhe “teprime emocionale” apo “ekstravagante” të një diplomati aristokrat. Ndërkohë, prof.Aleks Luarasi në fjalën e tij theksoi se “Faik Konica ka pasur një kontribut të shumanshëm si politikan, shkrimtar, publicist, diplomat dhe figura kaq komplekse kanë tërhequr vazhdimisht vëmendjen e studiuesve, për të ndriçuar pamje të ndryshme të këtij personaliteti poliedrik dhe historik. Studimi ndriçon në mënyrë të veçantë veprimtarinë diplomatike të Konicës, si i dërguari i jashtëzakonshëm dhe Ministër fuqiplotë i Shqipërisë në Sh.B.A në vitet 1926-1939 dhe plotëson studimet e mëparshme mbi këtë figurë, të cilat përfshijnë aspekte të tjera të veprimtarisë së tij”. Prof. Luarasi, duke e vlerësuar si një “libër që nuk duhet të mungojë në tavolinat e punës së studiuesve dhe të cilit duhet t’i rikthehesh vazhdueshëm”, vuri në dukje se “vepra është rezultat i një pune kërkimore të gjatë, konsultimit me dokumente arkivore, duke hulumtuar jo vetëm në Sh.B.A por edhe në disa vende të Evropës dhe Shqipëri, gjatë së cilës autori ka bërë dy gjetje të rëndësishme: dosja e praktikës diplomatike në Sh.B.A dhe një pjesë të bibliotekës personale të Konicës. Ky studim përbën një kontribut të rëndësishëm në fushën e historisë së shtetit dhe të së drejtës në Shqipëri. Në shkencat historiko-juridike trajtohet për herë të parë botëkuptimi kushtetues i Faik Konicës dhe në këtë studim ai shihet si një nga ideologët e shtetit shqiptar”. Libri u komentua dhe u vlerësua edhe nga shumë të pranishëm të ftuar në veprimtari, të cilët shprehën interes rreth botimit të ardhshëm të dosjeve arkivore diplomatike dhe jo vetëm relatimit të tyre në libër.