Ngjarje

BKSH: prezantohet “Brenga ime shqiptare” i Aldo Renato Terrusi

19 janar 2017




Biblioteka Kombëtare e Shqipërisë në bashkëpunim me Institutin Italian të Kulturës prezantuan ditën e enjten, më datë 19 janar, librin “Brenga ime shqiptare” të autorit italian Aldo Renato Terrusi, me pjesëmarrjen e Ambasadorit Italian në Tiranë, z. Aberto Cutillo, znj. Adriana Frisenna, drejtoreshë e Institutit Italian të Kulturës, z. Agron Tufa, drejtor i Institutit të Studimeve të Krimeve dhe Pasojave të Komunizimit, historianë dhe studiues të njohur si znj. Nevila Nika, z. Neritan Ceka, z. Gëzim Peshkëpia, etj.. Në fjalën e saj përshëndetëse Drejtoresha e Bibliotekës Kombëtare të Shqipërisë, Persida Asllani, u shpreh se “Biblioteka Kombëtare hap veprimtaritë kulturore të vitit duke iu bashkuar thirrjes që përcjell ky libër “për të mos harruar”. Ky vit do t’i kushtohet në mënyrë specifike kujtesës dhe hulumtimit, dëshmimit të ngjarjeve dhe pasojave të diktaturës, duke rrekur të kthejmë sado pak në vend dinjitetin njerëzor të thyer e nëpërkëmbur barbarisht” duke theksuar më tej se “pyetjet që shtron Aldo Terrusi në fund të rrugëtimit të tij sa jetësor aq edhe dëshmues dhe memuaristik kanë mbetur pa përgjigje. Mungesa e përgjigjeve ndaj pyetjeve kuptimplota e njëkohësisht edhe dëshpëruese nuk rëndon vetë mbi familjen e tij por mbi të gjithë shoqërinë shqiptare, ashtu siç rëndojnë qindra dosje dhe çështje të pazgjidhura të viktimave shqiptare të diktaturës komuniste”. Ky aktivitet paraprin kremtimet që do të zhvillohen me rastin e 100-vjetorit të lindjes së figurës më të shquar femërore të botës shqiptare, shkrimtares Musine Kokalari. Adriana Frisenna, drejtoreshë e Institutit Italian të Kulturës, duke kujtuar “shkrimtaren Musine Kokalari në prag të 100-vjetorit të lindjes” nënvizoi se “ajo është një tjetër figurë që bashkon Shqipërinë dhe Italinë. Të dy këto histori lidhen me diktaturën që përfshiu vendin dhe me fatin tragjik që trazon jetën njerëzore. “Brenga ime shqiptare”, një libër kujtimesh, është historia prekëse e një familjeje italiane që emigron në një vend mesdhetar, fati i së cilës do të përballet në fund me një tragjedi familjare”. Gjatë takimit u soll edhe një herë në vëmendjen nevoja për të kujtuar të shkuarën dhe për të mos harruar. Historiania Nevila Nika vuri theksin se “një popull pa një kujtesë është një popull i humbur. Po përpiqemi ta rikujtojmë të kaluarën tonë dhe ne duhet t’i rikthejmë këto histori për të mos harruar, për të mos u përsëritur më. Historia e Aldo Terrusit është një histori e dhimbshme, që ka të drejtën të kthejë në atdhe eshtrat e të atit”. Ndërkohë, Drejtori i Institutit të Studimeve të Krimeve dhe Pasojave të Komunizmit, z. Agron Tufa, nënvizoi se “libri është një rrugë drejt kërkimit, që shpresojmë se do të finalizohet, në atë çka përbën thelbin e identitetit njerëzor. Një narrativë që nis si një udhëtim introspektiv, që gërmon mbi të shkuarën dhe identitetin e familjes së autorit deri në momentin kur fillon tragjedia dhe vijon më tej më përpjekjet këmbëngulëse për t’i kthyer sado pak dinjitetin njerëzor një viktime të diktaturës për të përmbushur të drejtën për t’u lutur mbi varrin e familjarëve”.

I pranishëm në aktivitet autori Aldo Renato Terrusi rikujtoi për të pranishmit ‘kthimin në Shqipëri pas 44 vitesh, kalvarin e gjatë të kërkimit të eshtrave të të atit, takimet e pareshtura me dëshmitarë, zhgënjimet por edhe shpresat në përmbushjen e dëshirës së tij”. Një shtegtim në kërkim të origjinës dhe historisë së familjes, “Brenga ime shqiptare”, botim i Shtëpisë Botuese M&B, rrëfen udhëtimin e Aldo Renato Terrusi-t i cili kthehet në Shqipëri pas 44 vitesh, me dëshirën për të kthyer në atdhe eshtrat e të atit vdekur në Burgun e Burrelit në vitin 1952. Ndërmjet kujtimeve të familjes, dëshmive, fotografive të kohës dhe dokumente origjinale të procesit të të atit në vitin 1945 ripërshkohen ngjarje dramatike të historisë së Shqipërisë në vitet e sundimit komunist.