Ngjarje

Prezantohet në BKSH romani “Secili çmendet sipas mënyrës së vet” i Stefan Çapalikut

30 janar 2017




Biblioteka Kombëtare e Shqipërisë dhe Shtëpia Botuese “Gjergj Fishta”, në kuadër të “Vitit të kujtesës”, prezantuan ditën e hënë, mëdatë 30 janar, romanin “Secili çmendet sipas mënyrës së vet” tëshkrimtarit dhe studiuesit Stefan Çapaliku. Në këtë aktivitet, i konceptuar si një bashkëbisedim mbi “shkrimin e kujtesës” me vetë autorin e romanit, morën pjesë kritikë letrarë, studiues, studentë dhe lexues. Drejtoresha e Bibliotekës Kombëtare, Prof. Dr. Persida Asllani, duke kujtuar fjalët e filozofes gjermane, Hannah Arendt, se “asnjë filozofi, asnjë analizë, asnjë aforizëm, sado të thella të jenë ato, nuk mund të krahasohen për nga intensiteti, plotëria e ndjesive dhe e kuptimeve, me një histori të treguar mirë (të mirëtreguar) u shpreh se “tashmë, letërsia shqipe bashkëkohore e synon gjithnjë e më fort dëshmimin reflektiv dhe estetik të së shkuarës komuniste, si një pikëpjekje e vetëdijes artistike me atë etike të vetë shoqërisë”.

Stefan Çapaliku, duke folur për romanin e tij vuri në dukje se, “Secili çmendet sipas mënyrës së vet” sjell një panoramë të detajuar të qytetit të lindjes, Shkodrës së viteve ’70-’80, që përkon me kujtimet e fëmijërisë së tij dhe ngjarje që shenjuan fatin e mijëra shqiptarëve. Shkodra personale e gjithësecilit, ku edhe humori, si një formë e qëndresës ndaj diktaturës, nuk mund të mungonte. Shekulli XX si epoka e imazhit dhe specifikisht e Televizionit do të shpalosej një nga dimensionet më interesante përmes marrëdhënies së Diktaturës me TV dhe komunikimin e lirë, gjithmonë në “një armiqësi të përjetshme”.

Si një bashkëbisedim mbi kujtesën dhe shkrimin, gjatë takimit të pranishmit kujtuan edhe figura të shquara të kulturës dhe artit shkodran, si Frederik Rreshpja, Pjetër Meshkalla, Zef Zorba, Kole Ashta, Gjon Shllaku, Pjeter Gaci dhe figura emblematike e Prenk Jakovës dhe dashuria e tij tragjike.

Stefan Capaliku është autor i një sërë veprash dhe studimesh në fushën e letrave ku vlen të përmenden “Asgjë më shumë se kaq s'ka ndodhë” (1993); “Kronikë në lindje” (1996); “Kohë e ndalur: poezi” (1994); “Fjalë për fjalë = Word for Word” (2000); “Pesë komedi të përgjakshme” (2010); “Libri i vogël i dramatikës” (2011); “Allegretto Albania dhe drama të tjera” (2006); “Provat e një vdekje të paralajmëruar; Fausti prej Tirane; Një zjarrfikës nëoborrin e teatrit : tri drama” (2014); “Fishta satirik” (1995); “Martin Camaj : tradita dhe bashkëkohësia” (1994); “Ernest Koliqi : 1903-1975” (1995); “Letërsia e interpretuar : prijës për metodat bashkëkohore të leximit dhe tëstudimit të letërsisë” (1998); “Estetika moderne” (2006); “Zef M. Harapi & teatri i viteve '30” (2015), etj.