Ngjarje

BKSH, prezantohet “Danub” i shkrimtarit Claudio Magris

27 shkurt 2017




Mbasditen e 27 shkurtit, Claudio Magris, një nga shkrimtarët dhe eseistët më të shquar bashkëkohorë italianë si dhe studiues i mirënjohur i letërsisë së Europës Qendrore vizitoi Bibliotekën Kombëtare të Shqipërisë, në shoqërinë e Dr. Adriana Frisenna, drejtore e Institutit Italian të Kulturës. I ftuar në Tiranë, në prag të prezantimit të librit të tij të mirënjohur “Danub”, tashmë përkthyer edhe në gjuhën shqipe nga Alma Hafizi, zoti Magris u prit nga drejtorja e Bibliotekës Kombëtare, prof. Persida Asllani, e cila i uroi mirëseardhjen në këtë institucion të rëndësishëm të kulturës së librit duke i prezantuar atij përmes një ekspozite të vogël disa nga vlerat e rralla të BKSH-së, inkunabula, antikuare dhe dorëshkrime të vyera, një krenari e pasurisë kombëtare si për hershmërinë dhe informacionin e tyre ashtu edhe për vlerën estetike të kaligrafisë, ilustrimeve dhe ornamenteve që ato përcjellin për lexuesit e sotëm.

Duke shprehur entuziasmin e shkrimtarit dhe njëkohësisht të studiuesit të mprehtë, zoti Magris, shfaqi interesimin e tij të veçantë për gjuhën dhe letërsinë shqipe, marrëdhëniet e hershme kulturore mes Italisë dhe Shqipërsië si dhe theksoi kënaqësinë e faktit se tashme në këtë gjuhë të lashtë gjendeshin të përkthyera tri vepra të tij të rëndësishme si: “Udhëtim i pafund”, “Mikrokozmose” dhe “Danub”. Pikërisht variantin në gjuhën italiane të librit “Danub” ai ia dhuroi Bibliotekës Kombëtare të Shqipërisë me një dedikim të veçantë në shenjë miqësie për publikun shqiptar.

“Danub”, botim i Shtëpisë Botuese “Albas”, përkthyer nga Alma Hafizi, cilësohet si kryevepra e Magris dhe që e shenjon atë si një prej shkrimtarëve më të mëdhenj bashkëkohorë italianë. Peisazhe, humor, takime, reflektime dhe meditime të një udhëtari mendjehapur që përshkon me përkushtim e dëshirë rrjedhën e Danubit plak, që nga burimet e deri në Detin e Zi, duke ripërtypur idetë mbi një jetë dhe kulturën bashkëkohore, mbi ngjarjet e rëndësishme dhe vragat e lëna në kohë. Autor i një sërë veprash letrare, eseistike, publicistike, pjesë teatrale, etj., si “Një identitet kufiri” (1982), “Stadelmann” (1988), “Utopia dhe zhgënjimi” (1999), “Udhëtim i pafund” (2005), “Historia nuk ka përfunduar” (2006), “Verbërisht” (2005), “Ekspozita” (2001) , “Pra Ju do të kuptoni” (2006), “Etikë, politikë, laicitet”, “Alfabetet”, “Ese letrare” (2009), “Shënime civile” dhe në vitin 2015 “Letërsia është hakmarrja ime” së bashku me Mario Vargas Llosa. Fitues i një sërë çmimesh prestigjoze në fushën e letrave Claudio Magris në vitin 1986 iu akordua Çmimi “Bagutta” për veprën e tij “Danub”; Çmimin Strega me romanin “Mikrokozme”; Çmimin “Principe delle Asturie” Çmimin “Chiara”, etj. Në vitin 2016 u vlerësua me Çmimin Kafka për "merita të larta letrare dhe aftësinë për të përfshirë lexuesin".