Ngjarje

Ekspozitë me botime të Eqrem Çabejit

 

 

Në 100-vjetorit e lindjes së Eqrem Çabejt, personalitet i shquar i shkencës dhe kulturës shqiptare, më 10 tetor 2008 u hap në mjediset e Bibliotekës Kombëtare një ekspozitë me botime që pasqyrojnë veprimtarinë shkencore gati 45-vjeçare të tij në fushën e albanologjisë, posaçërisht atë të gjuhës shqipe.

Janë ekspozuar mbi 45 vepra që flasin për ndihmesën e shquar të këtij shkencëtari, ndër më të mëdhenjtë në fushën e albanologjisë, veçanërisht studimet mbi historinë e gjuhës shqipe, fonetikën historike dhe etimologjinë e kësaj gjuhe. Dallohen edhe studimet në fushë të gjuhësisë krahasuese për gjuhët indoeuropiane e ato ballkanike etj. Janë ekspozuara edhe një numër i konsiderueshëm artikujsh të botuar në shtypin shkencor më prestigjioz të huaj si dhe ligjërata të Eqrem Çabejt të mbajtura në konferenca të ndryshme albanologjike brenda e jashtë vendit.

Ndër materialet e paraqitura veçohen veprat shumëvëllimëshe Studime gjuhësore, botuar dy herë në Prishtinë si dhe Studime etimologjike në fushë të shqipes, botuar nga Akademia e Shkencave të Shqipërisë. Bien në sy edhe Meshari (1555) i Gjon Buzukut, botim kritik (në dy vëllime); Shqipja në kapërcyell: Epoka dhe gjuha e Gjon Buzukut; Hyrje në indoeuropianistikë etj.

Për herë të parë ekspozohet Letërkëmbimi i personaliteteve shqiptare (Mithat Frashëri, N. Drizari, Q. Panariti etj.) me albanologun e shquar danez, Holger Pedersen. Midis letrave bie në sy ajo e Eqrem Çabejt, drejtuar në gjermanisht këtij gjuhëtari, në vitin 1932, kur ishte ende student në Austri. Përmes kësaj letre albanologu ynë, me shumë kujdes dhe admirim për punën e albanologut danez, jep vlerësimet dhe vërejtjet e tij për veprën Albanesische Texte mit Glossar të Pedersenit, botuar në Leipzig në vitin 1895.

Në një nga vitrinat ekspozohen edhe studime dhe bibliografi që janë botuar për jetën dhe veprat e Eqrem Çabejt. Veçohet ndër to punimi i gjuhëtarit të njohur Shaban Demiraj.

Ekspozita u vizitua nga studiues dhe lexues të ndryshëm, të cilët shfaqën interes për botimet e ekspozuara, si shprehje e vlerave shkencore të këtij personaliteti të madh të jetës shqiptare.