Ngjarje

NJOFTIM

15 mars 2017




Biblioteka Kombëtare e Shqipërisë Ju bën me dije se sot, më datë 15.03.2017, rreth orës 10 e 40, në njërën prej hapësirave të fondeve të BKSH, nëpërmjet sistemit elektronik të sigurisë dhe mbrojtjes nga zjarri u sinjalizua me sirena të brendshme e të jashtme ekzistenca e një vatre zjarri. Menjëherë u ndërmor zbatimi i protokollit zyrtar për të tilla raste, në bashkëpunim me Shërbimin e Zjarrfikëseve, Policinë e shtetit, emergjencave civile dhe shëndetësore. Shumë shpejt situata u mor në kontroll nga Shërbimi Zjarrfikës, i cili jo vetëm u paraqit me shpejtësi në vendngjarje, por punoi me përkushtim dhe profesionalizëm. Është e rëndësishme të theksojmë se sistemi ka funksionuar në të gjitha hallkat e veta dhe falë koordinimit të menjëhershëm të të gjitha strukturave dhe institucioneve, si Shërbimi i Zjarrfikëseve, Policia e shtetit, emergjencat civile dhe specialistët e BKSH-së, situata u vu për pak minuta në kontroll.

Biblioteka Kombëtare e Shqipërisë thekson se nuk janë prekur as Baza e elektronike e të Dhënave Kombëtare, as mjediset ku ruhet fondi i Vlerave të rralla (Antikuarë, Dorëshkrime, Harta, botime me vlerë Albano-balkanologjike) si dhe Arkivi i librit e i periodikut shqip, çka do të thotë se asnjë prej titujve të dëmtuar nuk rrezikon të jetë zhdukur përgjithmonë, pikërisht falë këtij fondi të veçantë arkivor. Prej këtij fondi do të mund të riprodhohet nëse do të jetë e nevojshme, çdo njësi tjetër e dëmtuar.

Biblioteka Kombëtare e Shqipërisë Ju informon se specialistë të BKSH po punojnë me përkushtim dhe profesionalizëm për të evidentimin e saktë dhe të plotë, sipas të gjitha standardeve të bibliotekonomisë, të të gjitha njësive bibliotekare të dëmtuara.

Biblioteka Kombëtare e Shqipërisë, duke ndjerë detyrimin për të qenë transparente në informacionet që përcjell për lexuesin dhe publikun e gjerë, do të vijojë t’ju përcjellë informacioneve të mëtejshme.