Ngjarje

Biblioteka Kombëtare e Shqipërisë pjesëmarrëse në Javën e Bibliotekave në Kosovë

11 Prill 2017



Biblioteka Kombëtare e Shqipërisë mori pjesë në edicionin e XV të Javës së Bibliotekës organizuar nga Biblioteka Kombëtare e Kosovës “Pjetër Bogdani”, me pjesëmarrjen e Kryeministrit të Kosovës, z. Isa Mustafa, ambasadorit të SHBA në Kosovë, z. Greg Delawie, ministrit të Kulturës, Rinisë dhe Sportit, z. Kujtim Shala, ministrit të Arsimit, Shkencës dhe Teknologjisë, z. Arsim Bajrami, Prof. Dr. Persida Asllani, Drejtore e Bibliotekës Kombëtare të Shqipërisë, shkrimtarë, studiues, përfaqësues të kulturës e të politikës, pedagogë, studentë dhe lexues. Java e Bibliotekës, gjatë së cilës promovohen dijet dhe sfidat e bibliotekonomisë si edhe aktivitetetet kushtuar librit e kulturës së leximit, u zhvillua nga data 11 deri më 15 prill me temë “E Drejta e Autorit dhe Biblioteka”. Kjo Javë shënon edhe vazhdimin e bashkëpunimit të ngushtë midis Bibliotekës Kombëtare të Shqipërisë dhe Bibliotekës Kombëtare të Kosovës “Pjetër Bogdani”.

Drejtori i Bibliotekës Kombëtare të Kosovës, z. Fazli Gajraku, gjatë ceremonisë së hapjes u shpreh se “qëllimi i Javës së Bibliotekës është për të ngritur një rrjet të gjerë njerëzish akademikë, publikë, mësimdhënës, lexues, qeveritarë, krijues të politikave dhe financues, me të cilët bibliotekarët duhet të zbulojnë vlerën e thellë të besimit në bibliotekë” duke theksuar më tej se “kjo Javë e Bibliotekës shërben edhe si një ftesë për librin dhe bibliotekat si dhe përdoruesit e tyre, për t’u afruar edhe më shumë një veprimtari të natyrës akademike”.

Biblioteka Kombëtare e Shqipërisë, në kuadër të Javës së Bibliotekës, solli për publikun e Prishtinës ekspozitën “Musine Kokalari, vetëdija e shkrimit dhe qëndresës”, duke paraqitur fillimet letrare dhe veprën e plotë të Musine Kokalarit, të cilat më së miri e prezantojnë në dimonesionin e saj të plotë, si shkrimtaren e parë në letrat shqipe, themeluese e Partisë Social-Demokrate Shqiptare dhe si një intelektuale e shquar. Një vend të rëndësishëm në këtë ekspozitë zë edhe dëshmia e persekutimit ekstrem por edhe qëndresës së saj të pashembullt në emër të shpirtit të demokracisë dhe dinjitetit njerëzor. Materialet bibliotekonomike të ekspozuara kombinohen me dorëshkrime, dëshmi dhe imazhe. Në fjalën e saj përshëndetëse drejtoresha e BKSH-së, Prof. Dr. Persida Asllani, e cilësoi Javën e Bibliotekës si një “festë të bibliotekave” dhe theksoi se “bashkëpunimi i përhershëm midis dy bibliotekave është pasuruar edhe përmes organizimit të përbashkët të veprimtarive kulturore, duke synuar thellimin e shkëmbimit të informacionit, të njohjes së kulturës sonë dhe kryesisht autorëve. Ky shkëmbim i vazhdueshëm na lejon të pasurojmë dijen tonë mbi to dhe është një ‘festë’ e përhershme e studiuesve dhe universitarëve të dy vendeve”. Duke u ndalur në ekpozitën kushtuar intelektuales së shquar, e para në llojin e saj, Prof. Dr. Asllani vuri në dukje se “viti 2017, i shpallur si “Viti i Kujtesës” në kuadër të kremtimeve të 100-vjetorit të lindjes së shkrimtares Musine Kokalari, synon nxitjen dhe promovimin e çdo akti kujtese, veçanërisht atij ndaj viktimave të diktaturës komuniste. Ne besojmë se sot, rivendosja në vend e kontributit por edhe dinjitetit të tyre njerëzor, është një domosdoshmëri për shoqërinë shqiptare, për emancipimin tonë të mëtejshëm, për vendosjen e piketave tona sa kulturore aq edhe politike në ringritjen shpirtërore të një shoqërie demokratike të bazuar mbi vlerat më të mira dhe dinjitetin njerëzor”.

Si pjesë e rëndësishme e bashkëpunimit midis dy bibliotekave kombëtare, të Shqipërisë dhe të Kosovës, u zhvillua edhe Konfereca shkencore “Musine Kokalari, vetëdija e shkrimit dhe e qëndresës”, me një pjesëmarrje të gjerë me studiues nga Universitetet e Prishtinës, Tiranës, Gjirokastrës, etj. Kumtesat e Prof. Dr. Dhurata Shehri, Dr. Kujtim Rrahmani, Prof. Dr. Persida Asllani, Dr. Femi Cakolli, Dr. Albanë Mehmetaj dhe Ma. Blerina Rugova-Gaxha, u ndalën në dy tiparet thelbësore të figurës së Musine Kokalarit, atë të vetëdijes së shkrimit, si akt themelues i veprës së saj letrare dhe atë të vetëdijes së qëndresës përballë dhunës dhe persekutimit absurd komunist si akt themelues i rezistencës intelektuale e qytetare. Edicionin e XV i Javës së Bibliotekës me temë “E Drejta e Autorit dhe Biblioteka” ka vijuar me zhvillimin e sesioneve shkencore në fushën e bibliotekonomisë, promovime të botimeve shkencore, ekspozita, etj.