Ngjarje

BKSH i bashkohet kremtimeve për Ditën Ndërkombëtare të Librit dhe të së Drejtës së Autorit

24 Prill 2017



Biblioteka Kombëtare e Shqipërisë iu bashkua ditën e hënën, më datë 24 prill, aktiviteteve të shumta kulturore të organizuara nga Fakulteti i Historisë dhe i Filologjisë, Universiteti i Tiranës, në kuadër të Ditës Ndërkombëtare të Librit dhe të së Drejtës së Autorit, me pjesëmarrjen e studiuesve, shkrimtarëve, pedagogëve e studentë, përfaqësues të shtëpive botuese, etj. E konceptuar si një ditë “feste”, për të shkëmbyer ide e informacione si dhe për të promovuar te të rinjtë kulturën e leximit, kjo ditë u shoqërua me promovime të botimeve më të fundit studimore e letrare, tryeza të rrumbullakëta, ekspozita digjitale, bashkëbisedim me poetë e shkrimtarë, interpretime të krijimtarive artistike nga Klubi i Dramës të studentëve të Departamentit të Letërsisë si dhe Panairi i Librit.

Në fjalën e saj përshëndetëse, Prof. Dr. Valentina Duka, dekane e Fakultetit të Historisë dhe Filologjisë, u shpreh se “kjo është një ditë e rëndësishme, e kthyer në një traditë të bukur, me një sërë aktivitetesh kulturore, në mënyrë që Fakulteti të mos jetë vetëm një qendër pedagogjike por edhe një qendër e rëndësishme sociale për të rritur ndërgjegjësimin qytetar”. Ndërkohë, Prof. Dr. Lili Sula, shefe e Departamentit të Letërsisë, theksoi se “UNESCO kremton 20-vjetorin e themelimit të kësaj dite, ndërsa te ne prej 9 vitesh zhvillohen veprimtari me karakter promovues që nxisin kulturën e leximit te studentët, promovojnë publikimet më të fundit të shkencave albanologjike e që synojnë të nxjerrin në pah librin si instrument të fuqishëm të transmetimit dhe të ruajtjes së dijes”. Gjatë këtij takimi u promovuan 11 tituj të rinj botuar gjatë vitit 2016 në fushën e studimeve albanologjike, letrare si dhe krijimtari artistike si “Studime albanologjike -2”; “Lexuesi në kurth: estetika e Kadaresë” i akademikes Floresha Dado; “Qasje letrare” i prof. Ymer Çirakut; “Mbi kodin e dyfishtë: shkrime për letërsinë dhe kulturën” i prof. Adem Jakllarit; “Mitologjitë: ese” të Roland Barthes; vëllimi poetik “Gjama e erës” të prof. Erenestina Halilit; “Retorika e përgjithshme e Grupit Mi” që vjen në shqip përmes përkthimit mjeshtëror të prof. dr. Dhurata Shehrit; “Kadare: bibliografi” hartuar nga Prof. dr. Lili Sula dhe Jorina Kryeziu; “Kadare në letrat e sotme franceze” dhe “Adamah: poezi” të Viola Isufaj; “Reaksionari: kritikë dhe ese” të prof. Agron Gjekmarkaj si dhe “Sonete” të dr. Lisandri Kola.

Një interes të veçantë ngjalli tryeza e rrumbullakët “Letërsia si kujtesë”, me pjesëmarrjen e Agron Tufës, Persida Asllanit, Arben Andonit etj. Biblioteka Kombëtare, në kuadër të shpalljes së vitit 2017 si “Viti i Kujtesës” solli për të pranishmit ekspozitën digjitale “Musine Kokalari, vetëdija e shkrimit dhe e qëndresës”. Në fjalën e saj drejtoresha e BKSH, Prof. Dr. Persida Asllani theksoi se “shpallja e këtij viti si “Viti i Kujtesës” vjen me qëllim nxitjen dhe promovimin e çdo akti kujtese, veçanërisht atij ndaj viktimave të diktaturës komuniste. Rivendosja në vend e kontributit por edhe dinjitetit të tyre njerëzor, është një domosdoshmëri për shoqërinë shqiptare, për emancipimin tonë të mëtejshëm, për vendosjen e piketave tona sa kulturore aq edhe politike në ringritjen shpirtërore të një shoqërie demokratike të bazuar mbi vlerat më të mira dhe dinjitetin njerëzor”. Musine Kokalari përfaqëson një simbol ekskluziv në botën shqiptare, si shkrimtarja e parë në letrat shqipe, me një vetëdije të qartë për shkrimin e letërsisë, intelektuale e shquar e aktive në jetën sociale e kulturore të vendin, politikane bashkëthemeluese e Partisë Social-Demokrate, por edhe një prej figurave më dinjitoze të qëndresës kundër diktaturës komuniste, duke nisur që nga apologjia e saj në gjyq, e deri te përballja me një dinjitet të skajshëm femëror e njerëzor, intelektual e ideal ndaj torturave, burgosjes, internimit e keqtrajtimit të vijueshëm çnjerëzor fizik e psikologjik. Ekspozita digjitale solli për të pranishmit imazhe të rralla të dokumenteve arkivore, dëshmi, dorëshkrime, etj. Biblioteka Kombëtare e Shqipërisë, në kuadër të Ditës Ndërkombëtare të Librit dhe të Drejtës së Autorit, ftoi të pranishmit edhe lexuesit e saj të njiheshin me botimin digjital të veprës “Juvenilia” të poetit Ndre Mjedja në faqen zyrtare të BKSH (www.bksh.al), duke shenjuar me nderim edhe 100-vjetorin e botimit të parë të saj më 1917. "Juvenilia" mund të shfletohet online dhe të shkarkohet në çdo pajisje elektronike si kompjuter, laptop, kindle, book reader, smartphone, tablet, kudo dhe kurdo.

Më tej, përmes kumtimeve, diskutimeve, pamjeve filmike dhe imazheve u risollën në kujtesë autorë të mëdhenj të letrave shqipe si Mitrush Kuteli, Martin Camaj e Anton Pashku, si dhe autorë që krijuan në kushtet e burgut në regjimin e diktaturës komuniste në Shqipëri. Aktivitetet u pasuan me interpretime nga studentë të Klubit të Dramës të Departamentit të Letërsisë, bashkëbisedim me poeten Luljeta Lleshanaku si dhe në përfundim ndarjen e çmimeve për krijimet poetike 2016-2017.