Ngjarje

BKSH, prezantohet edicioni II me pjesëmarrjen e Jurisë shqiptare në Çmimin Strega 2017

27 Prill 2017



Në Bibliotekën Kombëtare të Shqipërisë ditën e enjte, më datë 27 Prill 2017, Instituti Italian i Kulturës prezantoi Grupin e Lexuesve që do të jenë pjesë në jurinë e Çmimit Strega 2017. Në fjalën e saj përshëndetëse drejtoresha e Bibliotekës Kombëtare, Prof. Dr. Persida Asllani, u shpreh se “Shqipëria merr pjesë për herë të dytë në Jurinë e Çmimit prestigjioz Strega, përmes Grupit të Lexuesve. Komuniteti i leximit dhe ai i librit është një vlerë e pazëvendësueshme e një shoqërie dhe demokracie”. Ndërkohë, znj.Adriana Frisenna, drejtore e Institutit Italian të Kulturës, e cila duke prezantuar jurinë që do të vlerësojë librat, si dhe autorët dhe veprat e tyre, të cilat do të konkurojnë për çmimin Strega 2017, vuri në dukje se “Juria prej 10 anëtarësh, e përzgjedhur nga Instituti Italian i Kulturës, përbëhet nga të apasionuar dhe njohës së gjuhës italiane, botues, përkthyes, docentë universitarë si dhe dashamirës së kulturës italiane”. Më tej znj. Frisenna theksoi se “këtët vit vlerësimi i Çmimit Strega do të ketë një risi, e cila synon t’i japë një rol më të madh lexueseve të romaneve italiane jashtë vendit në përzgjedhjen e finalistëve fitues”. Çmimi Strega, vjen në vazhdën e bashkëpunimit të ngushtë të BKSH-së me Institutin Italian të Kulturës dhe do të thellojë edhe më shumë lidhjen e ngushtë midis shqiptarëve dhe kulturës italiane. Gjatë këtij takimi u prezantua edhe libri fitues Strega 2016, “Shkolla Katolike” e Edoardo Albinati, një roman kompleks dhe voluminoz, ku në 1296 faqe rrëfehet Roma e viteve ’70. Edoardo Albinati është përkthyes nga anglishtja, autor romanesh, tregimesh, poezish dhe reportazhesh.

Çmimi Strega, çmimi letrar më prestigjioz italian, u themelua në vitin 1947 në Romë nga Maria dhe Goffredo Bellonci, me kontributin e Guido Alberti, pronar i fabrikës së pijeve Strega Alberti Benevento, prodhues i likerit me të njëjtin emër. Çmimi i jepet çdo vit një romani, shkruar në gjuhën italiane dhe botuar gjatë edicionit të parë, mes datës 1 prill të vitit të kaluar dhe datës 31 mars të vitit pasardhës. Fitimi i Çmimit Strega përbën prestigj të madh për veprën dhe natyrisht për autorin. Disa nga shkrimtarët që kanë fituar çmimin Strega, shumë të njohur edhe për lexuesin shqiptar janë Cesare Pavese (1950), Alberto Moravia (1952), Giorgio Bassani (1956), Dino Buzzati (1958), Giuseppe Tomasi di Lampedusa (1959), Umberto Eco (1980), Dacia Maraini (1999), etj.