Ngjarje

Kujtesa në arkivin fotografik të Marubit, në seminarin e shtatë “Përthyerje antropologjike”

28 Prill 2017



Biblioteka Kombëtare e Shqipërisë në bashkëpunim me Departamentin e Etnologjisë në Institutin e Antropologjisë Kulturore dhe Studimit të Artit (IAKSA) zhvilluan të premten, më 28 prill, seminarin e shtatë “Përthyerje antropologjike” me temë “Kujtesa në arkivin fotografik të Marubit” me pjesëmarrjen e veçantë të Dr. Zef Pacit, historian i artit dhe pikturës në Universitetin e Arteve si dhe antropologë, studiues, etnografë, studentë të Akademisë së Arteve, etj. Në ligjërimin e tij Dr. Zef Paci, një studiues i imët i fotografisë, u ndal në “përbrendësimin që fotografia u bën nocioneve si kujtesa, koha dhe realiteti si dhe prurjet e saj në kujtesën, objektive apo subjektive”. Duke folur për punën e tij hulumtuese disavjeçare në arkivat e Marubit duke kërkuar imazhet Dr. Zef Paci theksoi se “është si të shohësh një Kopsht Arkadik përsa arkivi, ashtu si vendi, mbart në vetvete, të kaluarën, nostalgjinë, memento mori-n, të vërtetën dhe fiktiven. Arkadia shfaqet si një mbretëri magjike që përkon me universin fiksional në të cilin ndodh historia, sa është e vërtetë është edhe fiksionale, dhe ajo inskenohet në studion Marubi”. Nga një arkiv individual e privat, arkivi Marubi u kthye në kolektiv dhe publik, ashtu si kujtesa jonë kolektive përbëhet nga copëza kujtese e jete individuale. Fotografia shihej si tabloja e vërtetë e gjërave, një regjistrim i pandërmjetësuar. Në fakt, fotografia pasqyron botën dhe njëherësh krijon një ligjëratë me të.

Foto Studio "Marubbi" u themelua më 1856 në Shkodër nga piktori, skulptori dhe arkitekti Pietro Marubbi, vetëm 19 vjet pas shpikjes së fotografisë. Fototeka Kombëtare “Marubi” është krijuar më 1970 pasi Gegë Marubi i dhuroi arkivin e tij personal shtetit. Në këtë arkiv gjenden rreth 500 000 negativë në pllaka xhami me tema të ndryshme, foto të ngjarjeve të rëndësishme historike, figura dhe personalitete të historisë kombëtare, por edhe pashallarë, vezirë, oficerë turq dhe deri konsuj të kombësive të ndryshme, njerëz me status të ndryshëm shoqëror, etj. “Përthyerje antropologjike”, kthyer tashmë në një traditë të suksesshme, është konceptuar si një seminar i Departamentit të Etnologjisë, Instituti i Antropologjisë Kulturore dhe Studimit të Artit në bashkëpunim me Bibliotekën Kombëtare, në të cilin prezantohen monografi, studimet më të fundit në këtë fushë si dhe shfaqja e filmave antropologjikë, që synojnë të nxisin e ftojnë në diskutim studiues, antropologë, etnografë, muzikologë, studentë, etj. Prej vitit 2016 seminari “Përthyerje antropologjike” zhvillohet në “Auditorium-in” e Bibliotekës Kombëtare të premten e fundit të çdo muaji.