Ngjarje

Homazhet dhe nderimet e fundit për albanologun Robert Elsie në Bibliotekën Kombëtare

17 Tetor 2017



Në përmbushje të amanetit të fundit të albanologut të shquar Robert Elsie për t'u varrosur në Alpet Shqiptare, në mjediset e Bibliotekës Kombëtare të martën, më datë 17 tetor, u kryen homazhet dhe nderimet e fundit. Për të nderuar kujtimin dhe veprën e albanologut, në homazhe morën pjesë autoritetet më të larta të vendit, Presidenti i Republikës së Shqipërisë, z. Ilir Meta, Ministria e Kulturës, znj. Mirela Kumbaro-Furxhi, Ministri për Evropën dhe Punët e Jashtme, z. Ditmir Bushati, z. Thomas Frashëri, përfaqësues i Kryeministrit, ish-Presidenti i Republikës, z. Sali Berisha, kryetari i Partisë Demokratike, z. Lulzim Basha, drejtori i Bibliotekës së Kosovës, z. Fazli Gajraku si dhe akademikë, profesorë, studiues, përfaqësues nga shoqëria civile dhe komuniteti fetar, miq dhe kolegë të albanologut, nga Shqipëria dhe Kosova.

Robert Elsie, krahas kontributit të tij të çmuar si albanolog, studiues e përkthyes do të kujtohet me respekt dhe mirënjohje nga publiku shqiptar edhe për vetëdijen dhe kujdesin e veçantë që tregonte për pasurimin e arkivave të Bibliotekës Kombëtare të Shqipërisë me dhurimet e veprave e artikujve të tij të shumtë studimorë. Ato përbëjnë sot një fond të vyer në fushën e albanologjisë dhe studimeve mbi letërsinë e kulturën mbarëshqiptare. Në fondet e Bibliotekës Kombëtare ruhen mbi 150 libra dhe artikuj shkencorë, kryesisht në fushën e albanologjisë, antropologjisë, përkthimeve nga thesaret e folklorit shqiptar, por edhe përkthime të autorëve të letrave shqipe, ku spikat kontributi i rëndësishëm përmes përkthimit të veprës epike të Gjergj Fishtës “Lahuta e Malcis”.

Botimet e veprës së tij studimore kushtuar Shqipërisë – dashurisë së tij të madhe – zënë fill me botimin në vitin 1986 të “Dictionary of Albanian literature” për të vijuar gjatë punë së tij 35-vjeçare me vepra të tjera të vyera si “Një fund dhe një fillim: vëzhgime mbi letërsinë dhe kulturën shqiptare bashkëkohore” (1995); “Albanian folktales and legends” (1994); “Histori e letërsisë shqiptare” (1997); “Një fund dhe një fillim : vëzhgime mbi letërsinë dhe kulturën shqiptare bashkëkohore”; “Studies in modern Albanian literature and kulture” (1996); “Kosovo in the heart of the powder keg” (1997); “The Viennese scholar who almost became King of Albania: Baron Franz Nopcsa and his contribution to Albanian studies” (1999); “Islam and the dervish sects of Albania : an introduction to their history, development and current situation” (1998); “Leksikoni i kulturës popullore shqiptare : besime, mitologji, fe, rite, doke, festa dhe veçori kulturore” (2005); “Das Albanische Lexikon des Evliya Çelebi (1662), und whas ein Derwisch auf der Durchreise alles wissen muss”; “Albanian” (1999); “Dendronymica albanica: a survey of Albanian tree and shrub names” (1998); “History of Albanian literature” (1995); “The Christian saints of Albania” (2000); “Evliya Çelebi in Albania and adjacent regions (Kosovo, Montenegro, Ohrid) : the relevant sections of the seyahatname” (2000); “Albanian folktales and legends” (2001); “A Dictionary of Albanian religion, mythology, and folk kulture” (2001); “Nopcsa, Franz Reisen in den Balkan : die Lebenserinnerungen des Franz Baron Nopcsa” (2001); “Letërsia shqipe : një histori e shkurtër” (2006); “Udhëtime nëpër Ballkan : kujtime nga jeta e Franc Baron Nopça” (2007)’ “Albanian literature in Greek script : the eighteenth-and early nineteenth-centry orthodox tradition in Albanian writing” (1991); “Benjamin Disraeli and Scanderbeg : the novel "The rise of Iskander" (1833) as a contribution to Britain's literary discovery of Albania” (1993); “Der Letzte albanische Kellner” (1992); “Evolution and revolution in modern Albanian literature” (1991); “Gjergj Fishta: the voice of the Albanian kation” (1993); “Hydronimica Albanica : a survey of river names in Albania” (1994); “Gathering Clouds : the roots of ethnic cleansing in Kosovo and Macedonia: early twentieth-centry documents” (2002); “Two Irish travellers in Albanian in 1322”; “The Earliest references to the existence of the Albanian language” (1991), etj.

Robert Elsie, njohës i shkëlqyer shqipes dhe kulturës shqiptare, ka përkthyer nga gjuha shqipe autorë dhe poetë të rëndësishëm shqiptarë si Gjergj Fishta, Migjeni, Ali Podrimja, Fatos Kongoli, Azem Shkreli, Flora Brovina, Ornela Vorpsi; ka bërë recencionet e një sërë veprash si të Ismail Kadaresë, Xhevahir Spahiut, Shaip Beqirit, Kasem Trebeshinës, etj.