Ngjarje

Biblioteka Kombëtare, 70 vjet gjuhë ruse në Shqipëri

22 nëntor 2017



Në Bibliotekën Kombëtare të Shqipërisë, në bashkëpunim me Degën e Gjuhës Ruse në Fakultetin e Gjuhëve të Huaja të Universitetit të Tiranës, përmes një pasditeje kulturore, ditën e mërkurë, më datë 22 nëntor, u kremtua 70-vjetori i mësimdhënies së gjuhës ruse në Shqipëri, me pjesëmarrjen e pedagogëve, studiues dhe gjuhëtarë, studentë si dhe përfaqësues nga Ambasada Ruse në Tiranë. Në fjalën e saj përshëndetëse, drejtoresha e Bibliotekës Kombëtare, Prof. dr. Persida Asllani, duke vlerësuar rolin e gjuhës ruse në përcjelljen e informacionit, u shpreh se “në fondet e Bibliotekës Kombëtare literatura në gjuhën ruse zë një vend të rëndësishëm dhe përfshin fusha të ndryshme të dijes, të cilat kanë luajtur një rol thelbësor përgjatë këtyre 70 viteve”. Dekani i Fakultetit të Gjuhëve të Huaja në Universitetin e Tiranës, Prof. dr. Artur Sula shprehu vlerësimin për kontributin dhe ecurinë e një prej katedrave më me traditë në mësimdhënien e gjuhës dhe kulturës ruse si dhe në përgatitjen e mësuesve dhe specialistëve të kësaj gjuhe. Ndërkohë një përshëndetje dhe falënderim të veçantë përcolli me fjalën e tij edhe zv.Ambasadori rus në Tiranë, z. Dimitri Kazmin, i cili vlerësoi “marrëdhënien e ngushtë midis dy vendeve dhe forcimin e tyre përmes bashkëpunimit ”

Gjuhë dhe kulturë, letërsi e arte, shkenca humane e natyrore, dije enciklopedie dhe profesionale – gjuha ruse në Shqipëri, qysh në fillimet e mësimdhënies 70 vjet më parë, u shndërrua në një burim të rëndësishëm komunikimi, informacioni, dijeje dhe formimi. Një kontribut të rëndësishëm kanë dhënë katedrat e gjuhës ruse, pedagogët dhe gjuhëtarët e talentuar, metodologjia e mësimdhënies dhe botimet e specializuara në dije e disiplina të ndryshme.

Këto aspekte trajtuan në ligjëratat e tyre gjuhëtari prof. Emil Lafe dhe inxhinieri kimist Dr. Pirro Begvasaj, të cilët ndanë me të pranishmit kontaktet e para me këtë gjuhë, vështirësitë por edhe ndihmesën e madhe që u dha ajo përmes literaturës së pasur në fushat kryesore të dijes. Këtë rrugëtim të gjatë e përfaqësuan edhe recitimet në gjuhën ruse dhe shqipe të studentëve të degës ruse me pjesë të përzgjedhura nga veprat më në zë të letërsisë ruse.

Në hollin e auditorit të BKSH-së u ekspozuan simbolikisht tekste përfaqësuese të fillimeve të studimit të rusishtes në Shqipëri, prej nga do të nisë më tej një rrugëtim i gjatë kulturor.