Ngjarje

BKSH, veprimtari kremtuese në prag të festave të nëntorit

27 nëntor 2017



Në prag të festave të nëntorit Fondacioni “Nermin Vlora Falaschi” dhe Biblioteka Kombëtare e Shqipërisë zhvilluan të hënën, më datë 27 nëntor, veprimtarinë kremtuese “Zonjat e paharrueshme të Shqipërisë”, me pjesëmarrjen e intelektualeve dhe personaliteteve të shquara të kulturës dhe shoqërisë. Gjatë këtij aktiviteti u promovua libri i gazetares së njohur Zenepe Luka “Testamenti i grave për gratë”, botimi i 3 vëllimeve “Musine Kokalari – Vepra të zgjedhura” si dhe u shfaq filmi dokumentar “Nermini dhe Vlora”, prodhim i Fondacionit Nermin Vlora Falaschi.

Në fjalën e saj përshëndetëse drejtoresha e BKSh-së, Prof.dr. Persida Asllani, duke vlerësuar rolin e jashtëzakonshëm të grave në kulturën, arsimin dhe zhvillimin e shoqërisë shqiptare, dhe në veçanti “të dy zonjave, Musine Kokalari dhe Nermin Vlora Falaschi” u shpreh se “këto dy personalitete e kanë nisur jetën e tyre fëminore e rinore përmes një rrugëtimi të ngjashëm, duke qenë që të dyja nxënëse të shkollës së Motrave Qiriazi, më tej të shkollës së Vashave “Nëna Mbretëreshë” e më pas duke kryer studimet e larta në Itali. Këtu rrugëtimet e tyre ndahen. Ajo çka i ndan ato është një hendek i madh dhune dhe urrejtje, midis jetës së lirë që përjeton Nermin Vlora dhe jetës mes tragjikes dhe dhunës, ku ndërtoi jetën e vet në mbijetesë, por me një dinjitet të jashtëzakonshëm Musine Kokalari. Fati dhe jeta e këtyre dy zonjave tregon shumë mirë edhe rrugëtimin e femrës shqiptare”.

Gjatë takimit u prezantua botimi në 3 vëllime “Musine Kokalari - vepra të zgjedhura”. Kjo seri përmban respektivisht botimin anastatik të veprave të shkrimtares “Siç më thotë nënua plakë”, “Nënua plakë në Romë”, “…sa u tund jeta” si dhe “Jeta ime universitare” përthyer nga Arta Marku, me parathënie studimore nga studiuesit italianë Mauro Geraci dhe Simonetta Ceglie si dhe një ese nga Visa Zhiti. Gjithashtu u prezantua edhe libri “Testamenti i grave për gratë” i cili përpiqet të tregojë se çfarë ndërmori dhe arriti të bëjë një fondacion gruaje, që ka emrin e shqiptares së madhe, Ambasadores së Kombit, Nermin Vlora Falaschi, përgjatë rrugëtimit të tij 15 -vjeçar, por jo vetëm. Në fjalën e saj gazetarja Zenepe Luka u shpreh se “ky libër sjell portretet dhe jetën e grave të shquara shqiptare, rolin e tyre në shoqërinë shqiptare, në kulturë, art, arsim, jurisprudencë, etj., nga mbretëresha Tuetë, Marigo Posio, Tefta Tashkon, Nënë Tereza, Musine Kokalarin, Nermin Vlorën, deri te zonjat qe sot na nderojnë si Margarita Xhepa, apo Tinka Kurti, Roza Anagnosti”. Sipas Lukës “ky libër merr përsipër të kryejë misionin e tij, për të treguar me fakte, foto dhe prova, se çfarë mund të bëhet sot për të bashkuar zërin e gruas shqiptare, të arbëreshes me kosovaren, të gruas intelektuale në Malin e Zi e Maqedoni, të shqiptares, që jeton mbi një shekull në Turqi, të arvanitases në Greqi, të atyre që jetojnë në Gjermani, në Kanada, në Amerikë dhe deri në Australinë e largët”.

Në fund të promovimeve të botimeve për të pranishmit u shfaq filmi dokumentar “Nermini dhe Vlora”, prodhim i Fondacionit Nermin Vlora Falaschi.